要搵莫雷拉騎馬，除坐騎有實力外，最緊要一早搵人，否則莫雷拉若已應承他人在先，再好實力的坐騎，他亦會推卻，因為在圈內，莫雷拉是位非常重口齒的騎師，說一不二，既接了聘約，再好的馬遲咗搵吽A也只會婉拒，至於他接坐騎的次序亦有安排，蔡約翰與他是有默契，莫雷拉有優先選擇權揀蔡廄馬，剩下的倉主才會另找人選。至於今次夜賽，方嘉柏馬房的「飛雲騅」（圖4號），開鑼前已卜定莫雷拉，剛好該場蔡廄冇馬報名，雷神立即應承。查上季「飛雲騅」所贏三仗，全為谷草一哩路程，三仗建功騎師分別為蔡明紹、何澤堯及莫雷拉，而莫雷拉替這駒建功時，並非一騎即勝，先是跑過場谷草一哩得第四名，鞍上人不服氣，再向幕後索騎，結果翌仗才能補中。原因是首仗莫雷拉騎此駒時，他對「飛雲騅」甚有信心，早段略為搶得急，末段在終點前五十米迅即轉弱，嗰場就益咗「隨我來」和「愛添勝」等後上馬，結果只得第四名，莫雷拉汲取了經驗，翌仗留放做好啲，結果輕取「全心全意」個多身位而回。之後到何澤堯接手，馬匹徹底開竅下打疊再贏。由於狀態大勇，季尾增程跑谷草千八米，此駒用番蔡明紹，面對潘頓的大熱門馬「曈曨光彩」，最終只輸一個身位得第二名，表現算有交代，今次跑番食糊路程，難怪方嘉柏咁緊張，一早卜定莫雷拉，擺明為此駒求取今季首場勝仗。