今季開始馬會推出二重彩，與單T彩池合併，「抽水」定為19.5%，比單T彩池以往的25%下調5.5%，派彩相對吸引得多。二重彩要順序揀中頭兩名，賠率有幾十倍，甚至過百倍，因此非常適合以「刀仔鋸大樹」的馬迷下注。前身「科卡士」的二重彩是上世紀流行彩池，馬會事隔多年重新包裝推出，一來希望增設更多玩法以迎合不同馬迷喜好，二來匯合彩池要與世界其他先進賽馬地區接軌，二重彩是外國主流玩法，此舉有望吸納更多海外注碼，為未來發展踏出重要一步。今季開始，最少出馬四匹場合便有二重彩玩，雖然是舊瓶新酒，不過對不少馬迷來說相當新穎，今日同大家介紹幾個二重彩玩法，有助大家進一步了解這個「新彩池」。二重彩玩法十分簡單，順次序揀中第一名、第二名，便可獲得派彩，與三重彩及四重彩係同一概念。而這項彩池投注種類有五種，分別為單式、複式、單式馬膽、複式馬膽及指定位置馬膽。連贏是香港最深受歡迎彩池之一，相信大部分馬迷都識玩，而二重彩其實是高難度版的連贏，因為要順序揀中，難度比連贏高一倍，從數字上來看，派彩應該較Q好分一倍。假若某一場連贏係派二百元，二重彩派彩有機會是四百元甚至更多，而實際影響派彩升水抑或縮水，主要取決於跑入前兩名馬匹，是熱頭冷腳，還是冷頭熱腳，所以投注策略相當重要。最推介玩法是單式馬膽，當有一匹熱門重心時，買獨贏賠率乏味，用單膽方式下注博冷腳入圍，比齋買W更精明，由於此玩意啱啱開始，點都要俾時間成熟，兼且養大咗彩池，估計二重彩未來對投注人會有利啲，未來值得留意。
意大利好手李寶利（圖左）自從去咗美國發展後，好似變咗另一個人咁款，即使曾經確診新冠肺炎，但康復後贏馬停不了，依家仲做埋德爾馬場嘅榜首騎師，累積獎金亦逾二百萬美金，成績非常之好。上周日李寶利又喺主場出擊，結果佢再一次食出大四喜耀武揚威，同時全日埋單獲四冠一亞三季，演出固然出色，而且喺重頭戲千二米草地二級賽的德爾馬打吡大賽，佢更為藍營高多芬名下嘅Pixelate建功，後上追過亞軍Margot's Boy，盡顯功架。對於今次可以為高多芬贏國際二級賽，李寶利賽後坦言非常感動，事關佢話等咗十六年，終於可以披上呢件咁有代表性嘅藍色綵衣贏大賽，心情非常興奮。另外，見到李寶利喺美國成績咁好，潘頓就喺社交平台大讚呢位意大利好手之餘，仲問李寶利如果自己去美國發展又會點，同埋可唔可以幫佢聯絡某啲馬房，然後李寶利又喺社交平台回覆潘頓，話美國馬圈呢邊暫時唔需要佢，因為潘頓騎功太犀利喇，晒搞鬼。