第七場、國際三級賽、一○○○米。轉馬房第一匹好掂，第二匹又得，如果你係馬主，唔使諗第三匹都歸隊啦！「怡昌」系以往同苗禮德冇乜交收，第一匹合作係「怡昌飛駒」，前季尾加盟首戰入Q，上季七戰三冠四亞，即係話轉苗廄後八戰全入Q；同主「怡昌福星」上季中亦過檔，冇耐就喺谷草開齋，其後再贏泥地。「怡昌寶寶」暑期亦改投苗廄，而此駒並唔係處女馬，前季登場已兩出兩捷，不過上季無以為繼之餘，仲經常跑到氣管有血。如今此駒健康俾老苗搞番掂，招牌應該又會省到立立靚。
第九場、第三班、一四○○米。「快馬飛馳」來港兩季僅八次上陣，真正硬拚不多，目前五歲評六十七分猶有上升空間，如保持良好進度，大有機會贏馬升上二班，今次千四米屬強項，切記盯緊。「快馬飛馳」前季來港已有極佳演出，三戰跑入冠季各一，贏馬為千二米。上季五戰全跑千四米，季初熱身兩仗後，到第三仗即以佳速掄元；勝後縱加分加磅仍後上追入亞軍，最後一仗敗於途中被阻及沿途走外疊，與實力無關，敗績可以抹去。「快馬飛馳」上季尾腳部曾不妥，但小休後健康已重納正軌，應係羅廄先頭部隊。