■袁偉豪（右）終於可一嘗當歌手的滋味。香港文匯報訊 （記者 李思穎）袁偉豪（Ben）剛推出新歌《你是你的另一半》，他接受主播許文軒訪問時透露唱歌是一直以來的夢想，沒想到夢想成真。
曾經他有一段日子想過放棄唱歌，一度把結他收起來，結果放得太耐結他線都生銹，他謂：「只係間中拎出嚟望下，好灰㗎！支結他好似畀人拋棄咁。」
《你》歌是他親自創作，他直言決定成為創作歌手：「我唔能夠話我喺演員方面去到樽頸位，但唔係每一次演出都咁完美、咁享受，而觸動唔到我嘅演出就要更加努力觸動自己去演，而做音樂是作出可以觸動自己嘅音樂，去令到聽嘅人都觸動，所以都係時候畀自己有個新嘗試。」未婚妻張寶兒（Bowie）為Ben的歌曲填詞，Ben希望這首歌可以成為以後大家求婚歌、結婚歌，甚至婚宴上播放成長片段的歌曲。
提到他和Bowie情侶檔合作，Ben謂：「有一期自己好抗拒，連工都唔想返，拍完嘢即刻想走唔想做訪問，我直頭覺得嗰個時期自己唔係一個演員，因為我拍套劇減20磅，搞到半死，親身上陣危險場口，大家只會問Bowie擔唔擔心，第日嘅新聞全部都只係袁偉豪張寶兒，次次都係講感情事、拍拖同幾時結婚。現在我都要豁出去，我唔能夠再用咁大男人心態面對，既然出歌同踏入人生另一階段都係開心事，不如自己唔好諗咁多無謂嘢。」