昨晚快活谷八場草地夜賽，本報斌匡錦囊貼中三Ｔ，三Ｔ正獎派八十一萬元，兼中埋第二口孖Ｔ派二萬二元。
蘇銘倫確診新冠肺炎
新冠肺炎全球肆虐，就連原本準備跑美國育馬者盃然後來港客串嘅萬人迷蘇銘倫，日前喺新冠肺炎檢測中兩度呈陽性反應，因此未能來港，除咗蘇銘倫，亦有兩位以法國為策騎基地嘅騎師，最近喺新冠肺炎檢測中呈陽性反應，分別就係曼迪沙寶同埋杜滿樂。據悉曼迪沙寶原本亦有機會前往美國，但因為檢測呈陽性未能成行，而杜滿樂則是自願接受測試，目前佢要在家中隔離七日，被迫放棄禮拜日喺意大利嘅分級賽。
距離每季馬壇盛事浪琴表香港國際賽仲有一個月，到底今年國際賽同國際騎師賽嘅具體安排係點，呢一刻都未具體落實。喺疫情未除嘅陰影下，今年國際賽同騎師賽開放俾公眾入場就唔多樂觀，加上有十四日入境隔離限制，亦直接影響外地騎師同外隊馬來港出賽嘅意欲。攪旺場內氣氛就無乜可能，但最低限度馬會都希望國際賽同騎師賽嘅戲碼唔會太過失色，呢段時間消息滿天飛，話馬會構思緊好多唔同方案，例如包機接送外地頂級騎師、向出席騎師賽騎師發出短暫客串牌照，或向當局爭取彈性分段隔離安排等等，吸引外隊人馬參賽。其實無論乜嘢應變方案，結果做唔做到都講唔埋，若疫情稍後又再反彈，原本應承來港嘅騎師同外隊，一樣可以取消行程。據知馬會方面一直同政府傾緊國際賽嘅安排，最好梗係滿足防疫要求之餘，又令國際賽辦得有聲有色，但一切都視乎情況變化。馬會可以話完全被動，只能見步行步。平心而論，國際賽又唔會攪唔成，最壞情況都係無外隊馬參與，變成純本地馬較量嘅四場頂班賽事，騎師賽就比較尷尬，要搵咁多個外地知名騎師肯嚟湊夠腳，都幾高難度，就算肯出錢都未必請到人嚟，呢個亦係現時馬會高層最頭痛嘅問題。
另一邊廂，上屆英國冠軍騎師莫艾誠，雖然早前曾經喺法國上陣嘅時候，被當地驗出尿液樣本含有可卡因殘渣，暫時仍屬帶罪之身，但呢件事未影響騎者心情，早前更喺英國南圍馬場，取得喺英國從騎以來第一千場頭馬，成績斐然。英國馬季喺上周六結束，早前布宜學曾一度落後莫艾誠十場頭馬，但最後都未能追上莫艾誠，莫艾誠最後以一百四十二場頭馬，衛冕英國冠軍騎師殊榮，而布宜學第二；排名第三則是馬昆，第四就是女將兼馬昆女友杜苑欣。另外，名將范義龍兒子兼卡塔爾集團副帥范奕倫，亦繼續蟬聯英國冠軍見習騎師名銜。莫艾誠表示，非常感謝卡塔爾集團以及團隊支持，自己一直盡全力去策騎，與練馬師包義定合作亦相當愉快；而包義定指，莫艾誠值得擁有如此成就，加上他在英國二千堅尼策騎「佳明驥」表現出色，為他留下難忘回憶。