■數名市民昨日到將軍澳壹傳媒大樓抗議，要求《蘋果日報》就報道盧俊宇「作故仔」假新聞抹黑警隊道歉。 大公文匯全媒體記者 攝質疑佢係咪想再犯國安法罪行 諷黎「申請坐監」
涉嫌違反香港國安法嘅壹傳媒創辦人肥佬黎（黎智英）最近官司纏身，政治能量愈嚟愈細，唯有喺社交平台同外國人對談博關注。繼之前有次對談講到自己流馬尿後，肥佬黎噚日又語不驚人死不休，話國家領導人「獨裁」，又話國家監控國民、滲透世界，叫國際要「聯手」回應國家嘅「欺凌」喎。有網民就反駁，如果國家真係「獨裁」，身在香港嘅肥佬黎「死咗九世」，仲邊有空間畀佢講埋啲咁嘅嘢呢？■香港文匯報記者 甘瑜
黎智英噚日喺網上直播同美國企業研究所（American Enterprise Institute）亞洲研究總監Dan Blumenthal嘅對談，「討論」中國問題同美國對華政策喎。成個直播都唔知想畀邊個睇，出街超過10個鐘，喺Twitter上得嗰32個like，而喺香港《蘋果日報》嘅facebook專頁度，都只係得百幾個like，5個留言咁大把，認真慘淡。仲有人留言問佢講香港未來，同外國人有咩好傾。
不過，肥佬黎依然盡情喺直播度抹黑國家，話國家領導人「獨裁」，仲同美國總統特朗普同一口吻，屈今次嘅新冠肺炎責任喺中國，仲叫國際社會「聯手」對抗中國𠻹。
網民：若「獨裁」肥黎「死咗九世」
唔少網民得知肥佬黎咁樣抹黑國家，紛紛留言狠批佢噏得就噏。「KT Cheung」話，如果國家真係「獨裁」，身在香港嘅肥佬黎「死咗九世」。
「Max Fata」亦話︰「你而（𠵱）家享用緊叫言論自由呀！獨裁果（嗰）個嚮北美。」
「Chester YK Hung」都話︰「（美國總統）特朗普先至係廿一世紀最威權嘅獨裁者，因為佢喺大選之後都唔認輸！」
有啲網民認為肥佬黎都係想最後再搞吓事。「Kai Lam」形容佢「垂死掙扎」，「Crystal Chan」亦反問︰「窮途末路盡地一鋪？」亦有網民質疑佢係咪想瀨多次違反香港國安法嘅罪行，「Yan de Rafael」話︰「申請坐監喎，由佢做過街老鼠啦。」