●王進洋爆粗鬧自己友係垃圾，結果俾張文龍踩場開拖。 王進洋fb截圖攬炒派區議員早前大鑼大鼓話要搞嘅所謂「香港公民議政平台」，最終喺�哋互相爭拗嘅聲音中流產，仲愈揭愈多內訌情節。離島區議員王進洋前日喺facebook大鬧支持解散呢個「平台」嘅自己友係垃圾，又話佢哋向支持者嘅道歉「唔代表我」，「平台」籌委之一、離島區議員梁國豪就踩場開拖，然後另一個「平台」籌委、葵青區議會副主席張文龍亦忍唔住加把嘴，話王進洋唔鍾意就應該退出籌委會，仲踢爆佢成日唔開會。王進洋就發晦氣話：「你怪囉咪。」其實，大家都係靠黑暴上位嘅攬炒分子，點都應該留啲薄面畀「同路人」嘅。
攬炒派中嘅「抗爭派」早前宣布解散「平台」嗰陣，將所有責任卸晒畀「傳統飯民」，話佢哋唔溝通又唔合作。有傳媒引述消息稱，民主黨同公民黨喺實際上限制黨員參與呢個平台𠻹。
民主黨嘅油尖旺區議員李偉峰其後出帖反駁：「作為一個民主黨成員，無收過任何一個民主黨人叫我加/唔加入平台！唔通民主黨已經踼（踢）咗我走？（咁要唔要CUT上繳）。」
佢仲話「地區上一直跨黨派合作做區+議政，有議題夾到，夾唔到都會出聲，就係咁簡單」，仲喺帖度標註「邊個出聲就係邊個搞分化」嚟寸班「抗爭派」。
「抗爭派」中人、王進洋亦出帖大鬧呢班自己友係「垃圾」，仲表明：「我講明先，我係有份表態決定議政平台要照攪（搞）。大是大非下，DQ咪DQ囉，無×左（咗）個議席又點，無左（咗）『泛民』自己唔攪（搞）得？今（前）日嘅道歉，唔代表我。」
張文龍踢爆王進洋成日唔開會
張文龍其後就踩入王進洋fb page開拖，稱自己「好少可指責人」，但今次「無奈地必須講」王進洋「最冇資格」講「唔代表我」，事關佢經常唔嚟開會，冇盡力避免呢件事發生喎。
王進洋深深不忿咁反問：「我黎（嚟）開會可以避免啲咩？」又話自己一開始已經唔想參加呢個「平台」，只係睇唔過自己友將搞唔成「平台」嘅責任推畀「飯民」，同開會完全無關，叫張文龍「唔好扯開啲野（嘢）黎（嚟）講。」
點知張文龍死咬唔放，踢爆王進洋多次缺席籌備會議，仲話對方：「講真，如果你當晚決定唔去馬就即刻退籌委，我真係唔會怪你講呢番話的。」王進洋最後就發晦氣：「你怪囉咪，我一直都唔係×緊你，你中（鍾）意攬上身嘅悉隨尊便。」
張文龍踩人嘅時候亦不忘為自己戴高帽，話就算結果同佢本身期望嘅「完全相反」，佢都會對集體決定負責。言下之意，莫非佢都好不滿呢個「平台」嘅其他籌委？
其實，大家早都見慣攬炒派為自己利益而互相攻訐嘅場面，只係情況由傳統「飯民」對疊激進攬炒派，變咗激進攬炒分子互相拆台，唔知佢哋今日仲講唔講得出當初嗰句「齊上齊落」呢？
■香港文匯報記者 雨航