●「光時」發起人喺討論區出聲明道歉。連登截圖自稱為「良心」網購平台嘅「光時」，早前被踢爆有主管肥上瘦下，每個月出糧袋十萬蚊不特止，仲有幾個部門主管一齊同流合污，令一班「手足」無得接受培訓之餘，又無工開。「光時」當時就激到一班「黃絲」發起罷買行動，仲鬧爆佢食人血饅頭。可能見自己無咗一班「黃絲」科水，生意愈嚟愈差，「光時」發起人噚日就喺討論區發表題為「光時於2021年重新出發，重拾初衷！」嘅文章，試圖氹返班「黃絲」繼續撐自己，但效果就充分展現出乜嘢叫自取其辱嘞。
舊人肥上瘦下 稱已換管理層
自稱係「光時」發起人嘅網民「兜風去吹風」噚日就喺連登出post，話要向所有「同路人」致歉，令大家對「光時」失望喎。佢話經過兩個月嘅時間，已經將問題解決，新管理層會更加公開同透明，會畀大家知道佢哋嘅營運情況同幫到幾多「同路人」。佢亦聲稱，新管理層「初心無變，會堅持到底」，仲口響響話「慳自己、唔慳手足」、「資源永遠先留比（畀）手足」。
不過，一班「黃絲」似乎唔多收貨，認為「光時」發起人講嘢模棱兩可，根本無仔細交代跟進方法。有網民就質疑所謂嘅「新管理層」係乜人，但發起人就避而不談，更有人嘲笑「黃色經濟圈」真係專搵「同路人」嚟呃。
網民睇穿呃課金圖謀
「Haul-away」就話「我幫襯其他『黃店』好過，『光時』永不再用。」「西灣河屠夫」話「出呢個post都係想大家貨（課）金，可能之前出糧已經使曬（晒）筆錢。」「五毛pr狗有限公司」話「成個黃色都係水魚圈啦」。
睇返「光時」發起人一年前話要建立生活購物平台，令社運自給自足，當時大量「黃絲」留言力撐，話個個月都會幫襯，聲勢浩大。點諗到一年後「光時」落得如斯下場，真係再一次話畀大家知，所謂「黃色經濟圈」，真係一個笑話。
■香港文匯報記者 倪思言