●好鄰舍北區教會發表「教會人事變動」聲明。 好鄰舍北區教會fb截圖好鄰舍北區教會早前就被踢爆隱瞞1,800萬捐款，該教會傳道人陳凱興夫婦仲立即同教會員工「割席」，自己一早離開香港去咗英國，留低佢哋喺度幫自己執爛攤。唔知黃圈係咪「割」開有條癮，鍾意我「割」下你，你又「割」下我咁，所以教會有20名員工決定發起總辭「割」返陳凱興轉頭。該教會最近就發聲明扮大方咁反擊，話「乃念各員工的勞苦，不追究未有依據合約勞資雙方離職通知期及代通知金的法定權益」喎。
教會聲明被批抹黑離職者
該教會20名員工早前發表聲明批評陳凱興，直言「望能以正視聽，令公眾對教會以至陳先生有更多的了解」，仲話因為受保密協議所限，未能透露太多細節。該會一位前幹事X接受媒體訪問時就話「教會見到有員工被捕，但就只諗點樣籌款，實在令人氣憤」，其中一位總辭聲明發起人更加話「而（𠵱）家已經唔會選擇相信陳凱興」。
面對教會事後喺facebook發嘅聲明，話會「寬鬆酌情處理」前員工嘅勞資雙方安排。聲明人Y就話，教會嘅聲明會令到公眾覺得佢哋大難臨頭各自飛、無義氣，佢表示十分唔認同，又話教會聲明中提到會提供法律支援，但其實都只係打畀「612人道支援基金」，事後再畀多一兩個律師電話咋。
由陳凱興走佬去英國，到教會20名員工總辭，去到最近教會再發聲明，成件事真係錯綜複雜。網民「我唔係黃子華」就話「教會又割，『黃絲』又割，呢班前同事唔係傻，到底咁吃力不討好為乜。先係被僱主背叛，再黎 （嚟）俾『黃絲』批鬥做五毛，到底呢班青少年幹事得罪左（咗）邊個？」「30天可改名2次」就話：「如果陳凱興其心不正或者作過假見證的，願耶和華重重懲罰佢！」「天然受遇上腹黑攻」亦指「依（𠵱）家係益左（咗）陳凱興」。
陳凱興係咪夾帶私逃，成件事真係耐人尋味，有待警方調查。不過，佢哋三方「割」嚟「割」去之下，據知好鄰舍北區教會只係淨返5名員工，唔知佢哋會唔會又要求「手足」捐錢畀佢哋「渡過難關」呢？ ■香港文匯報
記者 倪思言