●一眾藝人大談早前拍攝節目《野外步出》的趣事。香港文匯報訊（記者 梁靜儀）江嘉敏、趙慧珊（Aka）、鄺潔楹、孫慧雪及方紹聰（奶仔）昨日於將軍澳電視城錄影節目，大談早前拍攝節目《野外步出》的趣事。江嘉敏表示男友提議跟她一齊玩笨豬跳以增進感情，她就明言拒絕以令她害怕的方式求婚。Aka表示拍攝懸崖邊游繩當日有雷暴警告兼落雨，令她緊張到當場爆喊。
江嘉敏早前與方紹聰到東龍島拍攝節目《野外步出》，笑指最初還以為只是行山及清談節目並無難度，後來才知要玩飛索，因為之前她曾經在外國玩過，所以都不是好驚，但就被奶仔（方紹聰）玩時候的嗌聲嚇到心寒：「我本身畏高，而飛索大概滑行50米，於是我企喺懸崖邊喊咗個半鐘，被拍低晒啲醜態好樣衰，後來導演話我再唔落去就冇電再拍落去，最終推咗我落去，前後玩咗兩次，第二次只係企咗懸崖邊5分鐘就跳落去，見到自己有進步都幾開心。」
江嘉敏又稱至今仍未試過玩「跳樓機」，但就玩過滑翔傘，她又自爆男友提議她一齊玩笨豬跳：「佢話咁樣一齊經歷過生死，感情會再進一步。（男友想趁機求婚？）我接受唔到喎，唔好用啲我害怕嘅方式求婚，（咁妳想佢點求婚？）冇諗過，遲吓至諗。」談到她日前因忘記銀行戶口密碼以致不能提款，暫時被銀行凍結戶口，她竟得意洋洋笑說：「原本我身上有500蚊，但因為有朋友請食飯，至今500蚊仲原封不動，（戶口仲未解封？）打咗去銀行，但要我親身落去搞先得。」
Aka表示與奶仔去了畢架山挑戰游繩，本以為只是「BB班」程度，但因拍攝當日有雷暴警告兼落雨十分濕滑，在此情況下在30米高崖邊游繩，登時令她緊張到當場喊了5分鐘。不過一起游繩的奶仔卻沒有安慰她，只叫她不要喊，因為錄影機在他們的頭上，她喊的話就望不到鏡頭，而二人游繩期間更要挑戰食雞蛋及玩快問快答。問到以後是否不敢再玩游繩，Aka卻說：「今次第一次玩游繩，但玩完之後挑起條筋，之後想挑戰滑翔傘、四驅車及跳傘，人生點都要試吓，怕老咗骨頭脆就乜都試唔到。」
鄺潔楹玩滑翔傘超淡定
鄺潔楹雖然身形嬌小，但卻相當大膽，她於節目內負責「上天」環節，她說：「我負責去龍脊玩滑翔傘，拍攝之前監製同我講話我係特別嘅人，所以安排好特別嘅item畀我，我以為自己有分量，監製又睇得起，於是立即答應，大家都奇怪我點解會應承，原來係因為呢一個環節冇女嘉賓夠膽玩，原來監製係因為見我之前拍攝《三日兩夜》嘅時候乜都夠膽玩，就連Skydiving都玩到，覺得我大膽。」她笑指故事教訓她不要太易相信別人。
她坦言當日於高處玩滑翔傘一點驚的感覺也沒有，反而心情相當興奮，教練還以為她的表情只是配合節目效果，她又笑說：「我仲自備飛機餐，一粒燒賣上天食，因為奶仔仲驚過我，所以我第一個上去，喺空中停留咗30分鐘，我就食住燒賣等佢。」說到她如此大膽，豈不是不能夠在男生面前裝作小鳥依人？她說：「我一向都希望另一半也大膽，其實父母見我咁大膽都有鬧我，話條命係佢哋畀我嘅，做乜咁大膽，但我覺得人一世物一世，乜都要試。」她坦言有意在30歲前挑戰笨豬跳，笑言還有一年時間，希望今年內疫情過後可以往外地完成挑戰。