上季華籍倉口抬頭，姚本輝及呂健威一度包辦頭二位，結果姚本輝首度封王，威哥則排第三。踏入今季，即使有方嘉柏事先張揚全力衝冠，另一華倉羅富全也亦步亦趨，暫時只係落後方廄，究竟能否出現連續兩季由華人奪得冠軍練馬師的歷史性場面，值得細心分析。
雖然開倉僅踏入第四季，但羅富全於從練頭兩季均取得六十五場頭馬，贏得「六爺」美譽，跟上季以六十七場頭馬封王的姚本輝相比，只差兩場，可惜全哥當時遇上強勢的師父蔡約翰，最終只能於練馬師榜排第二及第三位，上季羅廄處於回氣期，只贏四十四場排第八。不過，今季羅廄成績再度彈起，早前更憑「天駟」取得在港第二百場勝仗，有望再度衝擊冠軍。目前只是一月初，距離馬季結束尚有六個月時間，談論爭冠的確有點早，但睇番羅廄馬匹多數保持健康耐拚。要衝擊冠軍寶座，最重要有子彈，今季羅廄不乏首季出道即有表現的自購馬，包括一出即勝之「健康愉快」，以及最近相繼建功的「天駟」和「南區有」，能夠讓自購馬迅速適應水土兼贏馬，固然是練馬師的功力，但能夠找到合適馬匹來港服役更是關鍵所在，羅富全近年由兒子羅峻濼幫眼揀蟀，在練馬師角度，若然可以引入評八十五分或以上的馬匹來港爭大賽，固然是好事，不過能夠因應馬主預算而購入具上升潛力的自購馬，也未嘗不可，況且此類自購馬往往於較低評分起步，隨時可以為馬房帶來更多頭馬。
四歲馬經典系列賽事嘅首關經典一哩賽，將會喺一月二十四日舉行，今年有唔少四歲精英都吼住三場四歲系列賽，預料到時場面星光熠熠。羅富全馬房的「夢想成金」上季尾服役開始已經一出即勝，喺一千米直路賽同千二米賽事都贏到開巷，早前已創六出六捷優異成績，由四班升上二班，幕後亦希望「夢想成金」可以一嘗跑四歲馬大賽嘅滋味。不過於元旦日賽事，「夢想成金」越級挑戰國際三級賽華商會挑戰盃，首次增程跑千四米，睇吓長力扳唔扳得上，可惜最後落敗而回，而幕後亦已表示，「夢想成金」將會放棄出戰經典一哩賽，會俾隻馬先小休一下，下半季應繼續主攻短途賽事。羅富全馬房今季戰績理想，可惜其徒弟陳嘉熙似乎未能受惠，陳嘉熙今季拚至上月初才憑師父訓練的「高友之星」在泥地短途開齋，事實上，陳嘉熙季初手風欠順，難免影響信心，兼且陣上犯規次數又不少，經常被罰停賽令陣上顧慮太多，因而未能交出水準，且看騎者可否盡快重拾信心，與師父攜手再贏馬亮相凱旋門。