無論𠵱家你在百業蕭條下身處逆境定係順境，相信一定都好希望一切可以重新開始，展開新一頁。結婚，或者可以增加開心氣場，2020年11月在日本上映的《STAND BY ME 多啦A夢 2》（見圖），故事講述大雄和靜香嘅婚禮，並以原作最感動篇章之一的第四卷「嫲嫲的回憶」為基礎，加上第二卷「我出生的那一天」改編而成，應該又再一次帶大家進入幻想世界，於笑聲、淚水之中逃離現實。
雖然香港未知幾時上映，但電影係為了與多啦A夢歡度50歲生辰而創作的第二部曲，亦係2014年電影《STAND BY ME 多啦A夢》的續集，實在非常令人期待。導演八木龍一、山崎貴，延續前作的風格，緊接前作「婚禮前夕」，以嫲嫲的一句說話：想見到大雄的妻子，就展開大雄回到過去探望嫲嫲，以及揭開大雄和靜香結婚的故事。
展開新一頁的開始，就係大雄無意中搵到嫲嫲縫補的啤啤熊布公仔，令他懷念起嫲嫲的溫柔和慈愛，就請求多啦A夢讓他乘坐時光機回到過去探望嫲嫲。點知嫲嫲不但發現他是來自未來的大雄，更說希望可以看到孫媳婦的模樣。大雄為了完成嫲嫲的心願，就帶嫲嫲坐時光機前往婚禮當天，但發現未來的大雄竟然逃婚！呢個本來很開心嘅婚禮，最後會變成點？嫲嫲嘅願望、靜香嘅未來，又會係點？就要等疫情紓緩，政府開放戲院，大家先可以知道結局。
不過，故事中分別聲演大雄的妻夫木聰，聲演靜香的宮本信子，就一定清楚劇情了。
文︰徐逸珊