第二場、第五班、一六五○米。「總統」系馬主章日源一向與沈集成合作愉快，過往合作兩駒「總統之光」同「總統至上」都贏過兩場或以上，前駒仲喺四歲系列經典盃跑第二，但現役「總統之星」跑咗十四次仲未贏，現評分仲跌至廿六分，馬房當然想盡辦法救馬。「總統之星」服役以來只曾在谷草千八米跑過一席亞軍，當時評四班四十二分，如今降到廿六分跑五班一哩，計數點都有競爭力；上場除羊毛面箍重戴眼罩，果然閃閃身跑第四，今次再縮程跑一哩，來個絕地反擊唔出奇。
第五場、第四班、一二○○米。蘇偉賢馬房的四歲馬「錢途永恒」，在紐西蘭由前香港騎師、曾任王兆旦馬房主帥的戴利初步訓練，周歲價為八萬澳元，到兩歲時再推出巿場，未達底價二十萬澳元收回，在紐曾經三次試大閘，到最後一課加眼罩力策下跑第四。父系「比亞路」，同父馬有香港經典一哩賽與香港打吡冠軍「添滿意」及春季冠軍錦標與蘭域堅尼盟主「包裝永勝」等，頗適應香港的競賽環境。其母是澳洲三項一級賽冠軍「海娉婷」的同母半姊妹，「錢途永恒」除血統極佳外，在港晨課亦見好表現，今次插班初出值得睇好。