● 陳展鵬慶幸自己歌影視上都遇到好老闆。香港文匯報訊（記者 李思穎）陳展鵬加盟新公司「天盟娛樂」重拾歌手夢，近日推出新歌《零歲》送給囡囡「小豬比」，相隔21年再戰樂壇，他說：「今次錄新歌，在監製舒文身上學到不少，他先給我做好多功課，就是要我聽同練好多新晉歌手的歌，好似有One Promise、 Dear Jane 等，對我有好大挑戰。」
今次 MV拍攝是跟新晉導演合作，展鵬表示：「大家一拍即合，溝通順利，公司都很支持，不計成本拍攝，首先搵到一個荒島，然後再運送大批巨型道具去現場，又有航拍，最誇張是專登租了一架遊艇畀我化妝整頭同休息，慶幸當日拍攝都好順利，而且天氣都好好，我都好驚會曬到唔同色會唔連戲。」
說到重拾歌手感覺，他謂：「可以再做返歌手出歌，就好似發緊夢咁，首先要多謝樂小姐（樂易玲）好鼓勵我之餘，仲介紹唱片公司老闆培哥（顏培意）我認識，我同培哥可以話係一拍即合，大家很多想法很接近，老闆亦好接納我對歌曲和 MV 上意見。真係好感恩可以喺歌影視上都遇到好老闆同好好的伯樂。而今次MV 製作費得到老闆無上限支持，加埋公司團隊同製作團結的配合同用心，出來成品真係好滿意。（未來想偏向歌手還是演員路發展？）希望做到歌影視、家庭都平均分配好時間。」