●譚詠麟透露4月再接種第2劑疫苗。香港文匯報訊（記者 梁靜儀）譚詠麟（阿倫）昨日出席港台《香港足球名人堂》節目啟動禮活動。譚詠麟、足球名宿張子岱及黃文偉等參與打手印儀式。台上司儀問到阿倫是否自小受到爸爸譚江柏熏陶而熱愛足球？阿倫說：「我細個太瘦弱，爸爸怕我俾人踢親，所以唔畀我踢波，直至中學時我偷偷去踢波，因為球場係瀝青地，我一星期換一對白飯魚，先至俾爸爸發現。」
早前打了科興疫苗的他，被問到事後有何反應？他說：「我3月5日打第一針科興，事前有諮詢醫生意見，我冇三高，（打完針有冇任何反應？）乜都冇，（好多人打完有唔同反應？）我同朋友一齊去打，我試過有日日間眼瞓，對我嚟講係好少可，（擔唔擔心？）淨係眼瞓冇乜擔心，我就冇聽過有副作用，4月初我就打第二針，當然打之前要自己check清楚心跳同血壓，啱規矩先打。」
說到他的好友曾志偉出任無綫副總經理，銳意改革綜藝及音樂節目，問到阿倫何時亮相無綫？他說：「得㗎喇，有需要時佢（指志偉）會搵我，最近通電話好密，（叫你做軍師、智囊團？）佢問我，我就提吓咁樣囉，（你有咩意見畀志偉？）我就話起碼音樂節目一定要做好，香港係華人社會，所有音樂資訊都係由香港發出去，所以做好香港音樂，尤其係唔區分你台我台，最緊要大家齊心，同一方向先至可做好音樂。」
另外，問到阿倫可有留意近日多位藝人因「新疆棉」事件與涉事品牌割席？阿倫說：「呢啲咁政治化嘅嘢梗係問返啲政治人物啦。」不過阿倫昨日身上所穿外套及波鞋，都不是涉及風波的品牌，而是本地設計師的得獎設計及西班牙品牌，他謂支持任何一個好的設計。說到他是否有備而來？阿倫得戚笑說：「我唔係一個普通藝人，（近日可要掉衣服同波鞋？）避得幾多，有啲fans送嘅有紀念性，點解掉咗去啫？（有網民燒掉有關品牌的波鞋以示抵制？）如果唔着咪捐畀有需要啲人。」