身為同路人嘅黃店，原來睇舖位嘅眼光都好一樣。黃店「鬍鬚仔」日前喺社交媒體公審租務公司違背承諾，搞到佢哋冇舖開，但點知就牽扯出，原來有份搶佢哋生意嘅係另一間賣同樣嘢嘅黃店「齊柏林熱狗」，仲要一次過KO包括佢哋在內嘅兩間黃店，搞到原本想賴藍店搶生意嘅黃絲「Down晒機」，圈內又鬥得你死我活。
事緣位於青衣長發街市嘅黃店「鬍鬚仔」早前因租務關係而結業，不過佢就相當不忿租務公司「建華」嘅安排，喺fb爆晒粗咁指責「建華」，聲稱喺兩年前同佢簽約時承諾成個街市只得佢一間漢堡熱狗店，點知上年就話要加租，今年又話唔俾佢再賣漢堡、熱狗，「你搵到有水魚畀（俾）得更多租，想趕（走）我同『魚蛋基』出聲丫（吖），唔洗（使）做埋呢d（啲）×忽鬼野（嘢）喎！」
起初一班黃絲都為「鬍鬚仔」抱不平㗎，仲想當然咁一口咬定同佢哋爭食嘅一定係間藍店，「Carol Cheung」仲話：「一定抵制新嗰間舖頭！」但現實畀黃絲嘅一記耳光比（畀）佢哋嘅口號更加響亮。原來搞到「鬍鬚仔」被趕走嘅，竟然係另一間黃店「齊柏林熱狗」。
網民「阿婆我愛鋤」就解釋話，其實「齊柏林熱狗」並唔係攞咗「鬍鬚仔」原本間舖嚟開，而係都開咗喺妏j籬個舖位，不過，原本呢個舖位都係有另一間黃店「魚蛋基」租緊，而「魚蛋基」同樣係被加租而迫走，即係呢一次嘅操作係迫走兩間黃店。
「齊柏林熱狗」嘅一間分店中人忙住剪建制派街站國旗嘅索帶，另一間分店就忙住搶同路人生意，真係好唔得閒。見事件愈發酵愈大，「齊柏林熱狗」就發聲明話，對於「鬍鬚仔」被趕走一事並唔知情，仲強調「建華」同佢哋冇任何利益關係喎。「齊柏林熱狗」稱，入青衣開店一直都係計劃之內，直到上年11月「建華」租務部問佢哋1號舖唔續租有冇興趣，睇完個場（舖位）當時亦知道有「鬍鬚仔」同場，聲稱「建華」當時冇話唔開得賣熱狗，叫佢哋自己考慮，而佢哋認為熱狗同漢堡包可以一齊共存，更加可以把街市年輕化，所以就決定咗入嚟呢度。
「鬍鬚仔」就似乎唔多受落，回應話：「呢件事我地（哋）『鬍鬚仔』員工上下話唔嬲『齊柏林』就假嘅。」網民「Adrian Wong」都批評「齊柏林熱狗」：「『建華』11月時通知你長發（街市）有舖既（嘅）時侯（候），其實你可以選擇唔去睇舖，大家同路人無需（毋須）要攬炒。」而「Celia Law」就話：「其實稍為用用腦就知，一個咁細既（嘅）場點會可能容許到有兩間咁類近既（嘅）食店一起同場？所以我又唔太信『齊柏林』所講，佢地（哋）熱狗可同漢堡共存。我覺得佢間接有份逼（迫）走左（咗）『鬍鬚仔』。」
蟲泰借機抽水 網民批分化
熱血公民（熱狗）主席鄭松泰（蟲泰）就唔嫌事大，揶揄晒兩邊：「黃店在藍到黑的場開舖，咁即係黃定藍？」
劇本總係驚人嘅相似，唔少人批評蟲泰走出嚟分化大家鬥黃，「KaKuen Sin」仲舊事重提：「鄭松泰最愛食美心，咁美心係黃定藍？」而蟲泰都有自己嘅粉絲，「Derek Lai」就附和話：「D（啲）黃人會Down機架（㗎）。」其實黃圈嘅內訌總係複雜得好睇過劇情，既然咁精彩，不如直接改名「黃色內訌圈」算罷啦。 ●香港文匯報記者 倪思言