攬炒派近年煽動嘅多場違法示威集會，都會有人大派「雨傘」，畀暴徒用嚟衝擊警方防線，甚至襲擊不同政見嘅市民。由攬炒派議員把持嘅元朗區議會宣傳工作小組舊年亦通過將2020至2021年度嘅紀念品預留撥款額30萬元，全數用作製作長雨傘。「元朗藍本」fb專頁日前就發帖踢爆呢批長遮質素差劣，連攬炒派「同路人」都話係爛遮。唔少網民就質疑買遮係「用來下次暴動」，仲話要「報廉記調查」。
陳敬倫暗指「手足」無把好關
「元朗藍本」日前以「元朗泛暴區議員 豪洗公帑30萬買爛遮」為題發帖(右圖)話：「元朗區議會宣傳工作小組在去年7月時進行會議，主席伍軒宏議員表示已預留撥款30萬元製作紀念品，成員通過用來製作長雨傘。近日開始派發。不過有人發現，原來豪使公帑30萬元，竟然係爛遮。不少人收到長遮後表示質素差劣。同一時間，泛暴派元朗區議員陳敬倫亦喺網上發布一張爛遮圖，又留言話好彩發現得早，但係就要QC幾百把遮，似乎是暗指一眾『宣傳工作小組』嘅手足同事無好好把關喎。」佢喺個帖度仲Hashtag「大花筒」「黑箱作業」。
區會紀念品變爛遮，唔少網民都話亂使公帑。「Feste Wong」話：「沒把關沒QC嗎？」「Rose Wong」就話：「無監管嘛，可以亂嚟。」
有網民就覺得買遮係同煽搞黑暴一脈相承。好似「Tony Chan」問：「用來下次暴動時用？」「Kenneth Chau」就話：「用政府資源補貼黑暴。」
唔少網民都認為要依法追究。「Grace Hung」話：「失責追究，浪費公帑，有否私相授受。」「Ying Hung Wah」就話：「報廉記調查。」
●香港文匯報記者 黃書蘭