第二場、第四班、一二○○米。馬主鄺啟成在港養馬已有三十年，早年曾養過「晴歌」同「凱歌」擺喺希斯度，共贏過六場，不過希斯返澳洲之後就改為支持蘇保羅，雖然今季希斯回流返港開倉，但鄺生未有將今季新馬「隨喜」歸隊返希廄，繼續支持蘇廄。蘇保羅之前為鄺生訓練「智愛」贏五場，成績唔錯，無理由要走。鄺生新寵「隨喜」狀態嚟得快，在港第二度出賽跑谷草千二米，以一百五十倍巨冷跑入第二；四歲馬持續進步，上次加程一哩無功而回，今次打王牌重返曾入Ｑ的千二米，隨時帶來喜訊。
第四場、第五班、一六五○米。賀賢馬房的「威威高星」，源自名牌買手John Foote貨源，但本身外表有別於一般「智能導彈」子嗣，遺傳了母系的灰毛特徵略為遲熟，再睇番母系家族的近代成員，在外地主要在一哩或以上路程贏馬，而且普遍四歲之後才踏大熟之年；上季初跑谷草一哩已上名，惟其後因健康問題進度徘徊；今季大前仗千四排十一檔，起步後收慢移入內欄跟跑，頭兩段步速比標準慢半秒，形勢對後上馬極為不利，但末段仍以勁勢追上跑第五，實力已露一手，今次首度落五班，開齋指日可待。