最近頻頻轉播海外賽事，幸好本地賽日與賽日之間還是有相隔兩天，總算給馬迷有點時間做一些賽前功課。以往試過周一跑完日馬隔一天在周三舉行夜賽，此舉實在令人吃不消，所以馬會已不彈此調。事實上現時每個賽日出馬踴躍，而且不乏初出新馬或首次在港登場的自購馬，加上近期夜賽編九場已是習以為常，無論馬迷或從事評馬的人員，如要細心研究各場賽事，做功課的時間經常會有感不足。事實上，唔少海外賽事筆者也有在電視機旁觀看，但博彩上則只是抱小注怡情的態度。本來這項賽事也可花時間來研究一番，但本地賽事馬不停蹄，實在已無餘暇為這類海外賽事做功課。相反如在本地賽事歇暑期間，有海外賽事轉播來港並受注的話，相信不少馬迷可抽多點時間投入其中，而馬會今季獲政府批准多播海外賽，部分還會在歇暑期舉行，到時勢必受到馬迷歡迎。
馬會近排恢復有限度開放馬場俾馬迷入場，賽馬日停止運作咗一段長時間嘅場外投注站亦陸續恢復受注服務，由初步開放十九間投注站增加到六十六間，睇嚟短期內馬場同全港所有投注站都會全面開放。疫情持續期間一直馬照跑，喺防疫限制下，普羅馬迷賭馬同投注嘅習慣已經完全改變，係想投注嘅點都會去開個投注戶口，大部分馬迷已經適應咗用手機或網上投注嘅形式，日後未必又去返投注站排隊買飛。不過，亦有啲年長馬迷，唔係咁掌握點用呢啲投注工具，佢哋想娛樂吓都非常困擾，投注站恢復開放，係可以照顧返呢班馬迷需要。平心而論，馬會慢慢開返場外投注站，一直考慮得好小心，所有措施都跟足政府指引，而且好多時比規定做得更嚴格，起碼投注站內係嚴格要求維持社交距離，並非過往人山人海嘅情況，其實開返馬場同投注站，最大得益者可能係喺投注站工作嘅馬會兼職員工，可以有返一份穩定嘅收入。
馬雅（圖左）在港策騎冇耐已贏得四場頭馬，呢位較莫雷拉年輕的巴西騎師，摸熟本地環境後相信成績會大幅躍進。之前從澳門賽事中目睹他的鞍上功夫，後來到新加坡亦取得佳績，不敢說他可跟莫雷拉相提並論，但要在香港躋身前十名必定綽綽有餘，不妨拭目以待。