●洪天明其實都好顧家。香港文匯報訊（記者 梁靜儀）周家蔚和好友姚樂怡日前上《日日媽媽聲》節目，接受主持人余安安、陳凱琳和羅敏莊訪問，大談她們跟丈夫經常分隔兩地的感受。節目中又播出洪天明之前離家8個月後回到家中，大仔洪大仁見到爸爸時的一刻，由初時不敢相信到天明除下口罩確認後，激動爆喊上前擁抱爸爸的畫面，全場主持和嘉賓睇片都睇到心酸。
周家蔚坦言初時與老公分開太久都好唔習慣，到他返到家時會有陌生感：「佢返家我第一個反應係推開佢，因為太耐冇見，想望清楚，個仔就會輕摑自己面部，佢想摑醒自己，係咪真係見到爹哋！」
周家蔚直言不斷告知小孩子和自己，爸爸離家是為了家庭着想，她自己也要明白丈夫要扛起頭家。余安安問到她，洪天明離開這麼長時間，可會擔心其他方面？周家蔚坦白說：「我講冇你信唔信吖？因為佢好多應酬，見好多人，成日都要飲酒，佢試過同公司同事去拍嘢，出面落雨又冇帶雨傘，工作人員又走晒冇人照顧佢，我都會擔心。」
曾勸天明接少些工作
姚樂怡又爆料指在等錄影期間，剛巧天明與周家蔚視像並審問老公：「點解你整咗頭？點解你戴副眼鏡又着到咁樣？點解你喺屋企就咁戴個頭箍就算？點解你出到嚟要着到咁靚？」她謂經常都有勸老公接少些工作，寧願他多點時間陪屋企，她說：「我寧願一家人開開心心一齊，唔需要好富貴住靚屋，但佢都好顧家，一返到屋企就會將屋企啲嘢搞掂，我都好感激佢，其實佢喺出面工作都辛苦。」
她又指都有叫老公多點跟兒子視像，但有時參與太多：「試過有日我鬧仔，老公突然喺個cam度講嘢，我嬲到叫佢唔好出聲，唔好睇cam住。」由於老公經常出外工作，每次她都會叫老公到達工作的酒店後，告知她酒店名稱和房號，但他經常唔記得。羅敏莊就搞笑問︰「唔記得定特登唔畀呀？」問到可有因為分開而鬧交？周家蔚坦言會詐型：「我會Block（封鎖）佢手機號碼，點知佢喺家庭群組度講『周家蔚你幾時unblock（解封）返我？』，搞到我有啲尷尬。」