● 展鵬會收看其他台的劇集知己知彼。香港文匯報訊（記者 梁靜儀）「視帝」陳展鵬相隔三年再有劇集播出，主演的《逆天奇案》自播出以來收視及口碑都不俗，劇集更成為上半年兩線劇集單集收視冠軍，日前就接受香港文匯報專訪，大談拍劇的苦與樂，以及對手馮盈盈令他有無形壓力，因對方好勤力，記性又好，講對白快到他接不住。展鵬又稱作為這個年代的演員，要與時並進。
展鵬在《逆》劇中飾演O記調查組幹探「森Sir」，已不止一次飾演警員的他，笑言還未演到悶，因有很多部門還未演過。劇中展鵬跟飾演駭客Ana的馮盈盈有感情線，二人初次合作，連一向不愛跟拍檔分享演戲心得的展鵬，亦大分方享個人經驗，甚至將觀眾的意見轉達告知盈盈，他說：「拍之前我就同盈盈講要將問題拎出來傾，我就將我睇到觀眾話佢好膠、演戲同講嘢似機械人冇情感、好造作嘅評語同佢講，其實我唔係覺得佢造作同好膠，可能佢一出嚟就做綜藝，有啲角色坅Y做得好，但有啲要到心。」展鵬認為演戲是要令觀眾感動，演員亦要接受觀眾的批評：「一定要睇網上評語，現在Social Media咁自由，唔可以一聽唔入耳就覺得全部都係衰人，如果要更上一層樓，就要知道成個世代做緊咩，現在觀眾唔係你畀咩佢就要睇，當然都要有獨立思考。」展鵬不諱言作為這個年代的演員，要與時並進，要知外面世界發生的事，他都會收看其他台的劇集，知己知彼。
雖然觀眾對盈盈的演技彈多過讚，但展鵬就大讚盈盈勤力、好搏，做足本分兼記性好，唯獨講對白：「盈盈講對白好快，快到我接唔住，令我都有無形壓力，唔可以NG，但唔係講晒對白、唔NG就代表好戲，所以我都經常同佢分析節奏同角色層次，我最難忘係我哋喺灣仔拍盈盈講述自己身世嗰場戲，通宵拍咗五個幾鐘至收工，但嗰場戲都唔係咁理想，因為佢太新，好多嘢未明，未入戲，未明何謂人生如戲，戲如人生，所以我覺得佢係一個技術性演員，唔係一個好感性嘅演員。」雖然拍這場戲好辛苦，拍到口乾兼翌日生痱滋，但都拍得開心。至於跟舊拍檔林夏薇合作，他認為跟盈盈不同，是另一種感覺，因薇薇對演戲好有熱誠及好有要求，加上今次再合作大家都已婚，對於兩性關係有另一種睇法，她會將生活體驗放落角色中，所以今次跟兩人合作都開心，從中亦學到很多。
港劇在內地有捧場客
展鵬又稱《逆》劇的播出，最開心的是媽咪，因媽咪見他三年沒劇集播出，加上現時大環境又差，她都好擔心。對於劇集收視揮低同期播映，由歐陽震華(Bobby）主演，以交通警為題材的《伙記辦大事》，展鵬謙稱都是歸功於拍攝手法及演員配搭讓觀眾有新鮮感：「警匪片係香港文化，港劇有一定捧場觀眾，所以今次監製拍攝手法同後期製作，拍出來嘅效果好有電影感覺，啱觀眾口味，加上演員又係新配搭，令到觀眾另眼相看。」
新劇不單在港受歡迎，更成了內地多個視頻網站的熱搜，這亦是展鵬意料不及，他開心說：「連內地觀眾都鍾意，幾難得呀！今次搵到個出路係開心嘅，同時開心係因為外面市場太勁，無論係製作或資金上，我哋都好難同人對撼，但原來觀眾就係鍾意港劇嘅味道，所以拍返我哋嘅節奏、我哋嘅題材，唔好再模仿太多嘢。」
近年事業愛情得意的展鵬，由以往甚少談及私人及感情事，到現時會主動提起愛妻單文柔（Phoebe）及女兒「小豬比」，不單經常在社交平台分享家庭生活，性格亦由以往的「唔Funny」變得健談，展鵬笑說：「我係70後尾期嘅舊派，以前我個年代係唔好搞咁多嘢，『少說話多做事』就係好，但Phoebe係90後，佢哋對好多嘢嘅睇法同計算又唔同，自己都會受影響。」
嫌太太演技未到家？
曾幾何時展鵬的衣着品味成了他的「死穴」，如今的他不單不介意，甚至主動重提，他坦言以往投放了很多金錢在衣着上，但出來是劣評居多都會有不開心。他又自爆：「有時同Phoebe大家都係着條喇叭褲，但我着條喇叭褲覺得似返去90年代，老婆會叫我試吓，但我覺得似拍緊《巨輪》，試過唔啱就算。」
說到Phoebe入行只主持過兒童節目，還未拍過劇集便結婚生仔，問到展鵬可想「夫妻檔」拍劇？展鵬卻嫌太太演技未到家，他坦白說：「我唔介意，但佢（演技）未得嘛，唔好勉強，我諗佢唔會拍戲，拍戲係一件好漫長嘅事，我唔係唔想佢拍，佢想拍就自己去學，拍戲係好專業，想拍就由低做起，佢可以出去玩吓啲小劇團，我好尊重太太，佢想試都可以。」展鵬又補充，其實太太入行已得到她最想要的，就是識到他，所以其他一切都不重要了。