●洪永城人逢喜事精神爽。香港文匯報訊（記者 梁靜儀）洪永城（Tony）與鄧梓峰昨日到荃灣出席《甲蟲愛不完 薪火傳世代》記者會，甲蟲車迷林子祥亦有拍攝短片打氣。近日宣布求婚成功的Tony，在台上表示有意買甲蟲車代步，希望將來可傳給子女。Tony暫定下半年行禮，但有不少親戚身在外地，其母也身在台灣，在疫情下，他不想老人家來回要隔離一個月，所以考慮直播婚禮，母親透過視訊飲新抱茶。
日前Tony宣布向拍拖2年的女友梁諾妍（Inez）求婚成功，昨日現身獲在場人士祝福，人逢喜事精神爽的他談到婚事更發出會心微笑。Tony表示近日收到很多朋友的祝福，令他喜出望外並很多謝大家。問到為何選擇在廁所求婚？他笑說：「因冇人做過，覺得廁所位置最適合，佢一打開門就見到花，心心同戒指，我係直線思維嘅人。」他透露女友當時感動到喊，自己都好感動，因大家拍拖2年都經歷了好多。問到求婚計劃度了多久？他說：「度咗3分鐘，（喺廁所度？）我知你哋標題想講話我有條屎橋！」
他又稱希望婚禮可在下半年舉行，已跟酒店商量關於賓客安排，但因疫情下有「限聚令」關係，同一個空間只能容納20人，所以仍在安排當中，希望疫情盡快過去。問到其家人是否在港？Tony說：「我媽咪喺台灣，如果叫佢返嚟有啲困難，都唔想老人家來回要隔離一個月，仲有我喺美國、新西蘭都有親戚，都諗住嗰日直播或Zoom，始終要畀親友知道，（媽咪點飲新抱茶？）facetime斟茶，新常態都冇辦法，（媽咪有冇見過女友？）有，佢都好鍾意，鍾意佢多過我。」
提到Inez透露想生小朋友，Tony表示有小朋友是相當幸福的，但暫時未有，問到是否未講得住？他笑說：「未有，結婚有個幸福家庭係相當美滿，都會朝住呢個方向想，都想做爸爸，年初已開始計劃造人，（年初已不設防？）有共識啦。」
收恐嚇訊息勿欺負女友
Tony指身邊好友如黃翠如、林夏薇都知他已求婚，大家都指他們好襯，都好替他們開心。提到黃翠如在社交平台發長文祝福他與Inez，又指感激Inez接收他，叫他不要欺負女友。對此，Tony笑說：「我喺社交平台收到好多『恐嚇』留言，所以我都唔敢蝦女友，我會對佢好好，佢係一個好女仔，好善良同正能量，同佢相處好開心。」至於有網民覺得翠如的留言似前度女友宣示主權，Tony認為是網民過份解讀：「我同翠如十幾年朋友，係好朋友至會講呢啲說話，喺呢件事上我同女友覺得冇問題，佢咁寫好好笑同好窩心，但當然大家有唔同角度同睇法。」
他又謂現正忙於拍新劇《凶宅清潔師》，待7月初拍畢新劇後就可以全力籌備婚禮，到時會再正式拍攝婚照，他說：「喺社交網嗰輯相唔係正式，係為咗公布求婚成功同自己留念，或者喺婚禮上show畀大家睇。」