 放大圖片
【本報訊】（記者 李思穎）粵劇界的「重頭」演出場地新光戲院將於今個農曆年後便結束三年半的租約，要是不獲續約，又沒有其他適合演出地方，粵劇界人士分分鐘面臨「失業」危機。身為八和會館主席的汪明荃正為此事費煞心思，希望爭取新光戲院可以繼續營運給粵劇界繼續演出。
阿姐昨日接受查小欣訪問時透露對爭取新光一事，個人所做已經有限，現時「八和」會館作一個中間人跟新光的業主、政府和聯藝機構希望得到協調，相信現時要政府出面先可以解決這問題。
業界搵食艱難
阿姐謂：「其實粵劇界欠缺演出場地在三年半前已經發生，政府到現時最後關頭業主要收番新光才話撥些場數出來，所以09年可以從適合場地撥出的場數好少，政府方面係有做嘢，但係遲囉，所以不可能在09年提供到像在新光戲院的200場出來，估計要到2010年才好些，所以09年沒有新光戲院，粵劇人士要減半演出，點搵食呢，可能要轉行。（粵劇海嘯？）係呀，情況好嚴重，粵劇界希望新光業主可以續約，不過業主一直不想見面，最初亦不願跟政府方面溝通，業界處於被動，但最近業主同政府方面的曾德成局長傾過。（結果係點？）我唔敢講，由政府方面講會好些，如果傾唔掂要收番新光，業界便要去政府提供的會堂演出。（粵劇界點去應付最嚴峻環境？）有另一個高山劇場，現時有些劇團都盡量嘗試這地方，但這場地有問題，始終要有個真係搵食地方畀人。」
阿姐左右為難
汪明荃說：「曾德成局長已經好願意溝通，奈何業主很奇怪，不肯同政府接觸，亦沒有明確方向，我唔知業主想點，大家都好r，佢又唔係一定要加租，佢要政府做嘢。（佢要政府做什麼？）唔知呀，所以依家已經唔係汪明荃的層次可以解決到，我都好被動，政府話有做嘢，業主話政府做得唔夠，但佢又講唔到點樣，所以我係遇著兩個好麻煩的人，我真係慘，去到又畀佢（指業主）鬧，鬧完政府又鬧我。（鬧你什麼？）我唔知，佢叫我不要再搵他。」
莫讓粵劇焗死
阿姐又說：「公道講，政府係有做嘢，不過做得少同埋做得慢，我又唔能夠話業主，佢三年半前已經續過一次約幫上很大忙，但現實情形西九的場地未見到，如何度過過渡期。（去廟街大笪地開檔？）係呀，可能要搭棚，大笪地都唔係長久，西九都要等7、8年，油麻地戲院只得三百個座位，非演出適合場地，粵劇正申請做非物質文化遺產，依家連戲院都無，這樣會給你成功申請嗎？其實粵劇仍有得發揮，無需焗死佢變成文化遺產。」
|
放大圖片
