|
李自明
反對派再推五區總辭，最弔詭當屬公文袋（公民黨）先是「話嫁又唔嫁」，再來招「唔嫁又嫁」，「𡟼盤」連番急轉彎，看似戲劇性十足，但睇慣政壇變臉戲的人不免感到「得啖笑」，皆因劇情並非峰迴路轉，公文袋「時溫和、時激進」的取態亦只屬「情理之中」。政壇高人直言，公文袋及丐幫（社民連）高呼爭取民主普選的「高尚面紗」，背後其實通篇「美麗謊言」、滿腹黨派私利：「講就好聽係要爭取民主，實質反對派唔同黨派各有盤算：丐幫要鞏固基本盤，公文袋怕被邊緣化，企圖搶佔主導權；白鴿黨（民主黨）猶豫不決，只因黨內分歧巨大，參與總辭隨時輸凸。一場總辭鬧劇，已充分體現反對派非以市民利益、民主發展為先，而是黨派私利至上的真面目。」
未經「三思」 已關溝通之門
政改諮詢文件甫出爐，早前說過要先談判的公文袋未待「三思而後行」，即刻「𡛨一聲」關上溝通之門，啟動總辭，態度之激與丐幫不遑多讓。政壇高人卻見怪不怪，指出公文袋班大狀又非第一次施展變臉奇技，只是學藝未精，「變得有啲核突、錯漏百出：「就說阿豬余（余若薇），之前先公開講冇其他政黨參與，總辭冇代表性；噚日突然就話，如果人哋唔做，佢哋都會落手落腳，今日再話咁唔係要向白鴿黨施壓，呢啲咁自相矛盾嘅講法，真係要專業訟師先識得點自圓其說！」
內部分化 只計算黨派利益
公文袋再度「轉𡟼」，雖激起些許「口水」漣漪，卻未有帶來「驚喜」，反而盡顯反對派陣營的內部分化，高人認為究其原因正是反對派各有計算。
「公文袋點解兵行險着？其實好簡單，事關組黨幾年下來，公文袋聲勢不升反減，做唔成反對派陣營一哥，更加同特區政府、中央政府冇偈傾。但一眾藍血大狀唔識咩嘢叫馬死落地行，反而中咗丐幫嘅激將法，錯搭總辭賊車；騎虎難下之下，唯有寄望盡地一煲搶回主導權啦。丐幫作為反對派極端分子，賣點自然係有咁激去咁激，提出總辭都係為咗鞏固基本盤。
「白鴿黨一樣計緊數，總辭唔止冇着數，一眾地區中坑、千年老二一則唔想冒險，更加唔想畀公文袋同丐幫乘機搶票，黨內分歧嚴重，內部壓力大到難以承受，如果白鴿陪住癲埋一份，隨時分裂解體。其他蚊型黨就醒目呢，明知總辭冇料到，隨時輸埋間廠，梗係費事同你癲啦！」
激進選民少 難獲過半選票
如此看來，反對派根本就是「猛篤私利計數機」，對外卻打着「民主至上」的「靚旗」，以為披住張「高尚面紗」便可「得米」，政壇高人對此則大搖其頭。他說，他們的如意算盤根本打不響。譬如丐幫，說就是說可以吸納到極端支持者，但香港有多少支持極端立場的選民？他們好大機會拿不到其他反對派的票源，尤其是溫和、理性的中間選民都不會支持他們，加上補選不同比例代表制選舉，「係1打1對決，丐幫攞唔到一半選民支持，分分鐘輸埋個議席，到時都唔知辭嚟做乜。」
「公文袋都一樣啦，成日話係民主與非民主對決，但大家都知選民對政改爭拗已經好厭倦，大部分理性選民亦唔會支持激進反對派，到時選舉氣氛冷淡，投票率奇低，就算選得到返入去，都達唔到咩效果。如果輸埋議席，就更加醜死怪囉！」
高人又循另一個觀點出發，笑指「總辭非壞事」，除為市民上一堂「政治騙局拆解術」外，亦令精明的選民看清楚反對派私利為先的真面目。
|
