 放大圖片
■「長腳蟹」因肯搏肯露，最近工作接踵而來。
近期不少電視台姐仔跳出公仔箱走進大銀幕拍電影，呂慧儀（Koni）就是其中一人，更「升呢」夥拍周秀娜，成為電影《惡胎》第2女主角。一向走性感路線的Koni，今次不但素顏示人扮大肚婆，更為劇情嘔足十幾次，認真有苦自己知。
新片中，呂慧儀飾演的啤酒妹，辛苦地為男友黎諾懿供書教學，本以為苦盡甘來時，黎諾懿卻與周秀娜發生婚外情，更令Koni失去肚中的骨肉。說到今次不用行性感，Koni笑言更是考自己的演技，「我在電影中本是讀書唔多的啤酒妹，因為深愛黎諾懿，佢又想做醫生，咪努力工作供佢讀書囉。當中最考我演技的一定是要我扮大肚婆，而且一開始就講我有咗三個月，之後小產，咁我咪多留意身邊的大肚婆。幸好我家姐同好友徐淑敏當時都大緊肚，多些和她們溝通，了解她們的心態同留意她們的小動作。」聽落好似好易，但原來Koni話扮反胃、扮嘔時，真是少些功力都唔得。「平時在熒幕上見人嘔，以為好易啦，點知嘔咗十幾次導演都未收貨，最後自己見到那堆嘔吐物都覺嘔心，真係反胃，變成真嘔。」
現階段專注工作
早前宣佈與拍拖7年的港男男友黃文迪結束戀情，那現階段工作不斷的呂慧儀會否想再次拍拖呢？「其實我都幾算事業型女性，一投入工作就會好忘我。再者公司畀咁多機會我，我都希望搏殺多幾年，專注工作。但當然，我亦明白有時緣份的事好難講，所以好多嘢話唔埋。如果你問我對另一半的要求，對方一定唔可以有女朋友，我唔想做第三者，因為之前被人hurt過。那是我讀大學時的男友，佢有段時間行為古古怪怪，我直覺是有第三者，於是單刀直入問佢，最後證實咗，我立即同佢分手。我覺得兩個人拍拖，一定要專一，這是人與人之間互相尊重的一部分。」記者突發奇想地問了一句，那會否未婚生BB呢？呂慧儀撒嬌地說：「都話我現在沒有拍拖，何來未婚生BB呢！但當然又真是好難講，自己答完都覺矛盾，哈哈！」
大讚阿姐好玩得
呂慧儀是06年港姐季軍，曾是模特兒的她擁有一雙43吋長腿，最為人熟悉的是在劇集《原來愛上賊》飾演「長腳蟹」一角，令人眼前一亮，獲得不少網民欣賞。入行3年因為肯搏肯露，機會不斷，現在晚晚在《女王辦公室》中港女上身，對老公陳山聰大發雌威。很多新人都覺阿姐汪明荃好惡，對她又敬又畏，但Koni卻大唱反調，大讚阿姐好玩得。「阿姐份人其實是好嚴謹，但不是惡、不是霸道。她份人好唔鍾意人遲到，咁我都係，而且在劇中，我們在辦公室做對手戲場口好多，佢好樂意同我們分享拍攝經驗。好似杜汶澤成日都捉弄阿姐，阿姐不但不嬲，仲玩埋一份，又成日同我們一起食飯。我想做呢行是人夾人緣，像之前同羅蘭姐做《迷》，大家好好傾，現在都有Keep住聯絡。」 ■採訪：植毅儀 攝影：彭子文
|
放大圖片
