 放大圖片
■整個訪問，蔡少芬一提起老公張晉即流露愛慕表情。
香港人整天說追求男女平等，但當一對情侶拍拖時，又話男士需有風度，不論行街買衫還是去食飯，當然要男士付錢，漸漸地男士形容這些使人唔使本、注重物質的女生為「港女」。當女生知名度比男生高，大家又會覺得兩人的相處是「男卑女尊」，活生生的例子有蔡少芬(Ada)。但在蔡少芬口中，老公張晉比任何人都叻。今天她就是要告訴大家，蔡少芬是如何瘋狂地崇拜老公。
記得在07年年尾，各大報館均收到蔡少芬親筆傳真，內容大致宣告要和內地演員張晉的結婚喜訊，更大讚對方是「極品」。談起當時公告天下的舉動，蔡少芬自言既然認定了對方，那走進教堂是自然的事，而且沒有後路。「我03年開始同老公拍拖，兩人拍拖5年，07年宣佈結婚。既然選擇同佢結婚，即已經認定了他是行一世的人，我就是要話畀全世界知，因為結得婚即是沒有後門。拍拖是兩個人在互相了解，唔夾可以換畫，但基督徒結婚不會離婚，有問題只會想辦法去解決！拍拖初期，老公來香港玩，我一廂情願地為他安排了密麻麻的活動，總之他來七日，我就足七日有活動，日日都和我的朋友見面、食飯。後來我發現佢好似唔係咁開心，咪問佢做咩，佢話其實唔想我安排咁多行程畀佢。因為我是一個唔靜得的人，我一在香港就會日日call朋友出來食飯，我亦希望佢來到香港可以見下我的朋友，所以不斷幫他約人。大家溝通完，老公話唔想我安排咁多聚會，我接到電話會先停一停問下佢意見，佢話OK我先應約，我倆拍拖的過程，我學會尊重，當然我寫那傳真畀大家，都有畀老公過目先。」
兩位一體的生活
蔡少芬的老公張晉是內地演員，龍虎武師出身。論人氣、論知名度甚至收入，都比蔡少芬少一截，故結婚2年來，傳媒都把兩人關係寫成「男卑女尊」。聽到記者的形容詞，蔡少芬把音量提高了幾分，勞氣道：「識我的朋友都知道我同老公相處是我卑佢尊，唔信你問下我助手。(助手點頭和應。)我老公在香港可能冇我咁出名，但他在內地好多人識。你們傳媒成日話佢收入比我少，點解要計這些？我的錢即是他的錢，他的錢即是我的錢，老公的錢畀晒我去投資，但每次投資前我都會同佢講，同佢商量。我事無大小都同佢商量，生活中張晉是話事人，蔡少芬只是去跟他的決定行事。結婚後，兩個人融為一體，我無計過自己賺多他幾多。」
準備隨時有BB
早前在活動中，張晉公開表示在自己心中蔡少芬只有25歲，唔急於造人，聽到如此冧的說話，難怪蔡少芬對老公死心塌地，在記者面前毫不掩飾自己對老公的傾戀之情。「我老公好叻，又有才華。說真我只是識演戲，其餘咩都唔識，但我老公唔同，除了識演戲，又識功夫，而且又勤力進修。好似我成日話學英文，得個講字，水過鴨背，我老公就真係用錄音筆錄低去學。我份人好心急，有時同我老公出街，明明仲有好多時間，我著好衫就不斷在催促他，我老公就會慢條斯理地整好所有事。但通常出咗門口後，我就會發現自己好多甩漏，我們相處就是這樣，一凹一凸。」
那到底蔡少芬是否已Ready隨時生BB呢？「結咗婚兩年，我同老公都覺得現在絕對是適合的時間生BB，我們都有計劃去生小朋友。好多雜誌又寫話我要去睇醫生諗方法生BB，我想同大家講我條腰是有事，但未去到咁嚴重。但大家都是女人，你要明白其實一個月只有5日機會中，但永遠不是我出去拍戲，就是老公出埠。有記者朋友建議我學好友黎姿，用科學方法懷孕，但呢一刻，我同老公都希望順其自然，等上天的安排。」
|
放大圖片
