 放大圖片
■王祖藍透露今次公司斥資近百萬搭建超級市場的廠景拍攝，食物都用上真貨。
香港文匯報訊（記者 梁靜儀）王祖藍與萬綺雯（蚊蚊）、林盛斌（Bob）、陳嘉佳（細細粒）及梁嘉琪等人，昨日於將軍澳電視城拍攝新劇《老表，你好hea！》。身兼編劇的祖藍透露劇中女友李亞男主要跟張繼聰多對手戲，二人更在早前拍《忠奸人》時已經咀過，難怪他嚷着說要說服張繼聰之妻謝安琪拍劇，然後由自己咀謝安琪「報復」。
祖藍表示今次公司斥資近百萬搭建超級市場的廠景拍攝，不單食物、生果用上真貨，就連收銀機及雪櫃等也是用真的。祖藍表示劇中有八十多場戲都會在超級市場廠景拍攝，而昨日主要拍攝一場講述他們在超市內掃減價貨的戲份，由於太真實，引來了隔離廠的導演和監製都爭相向他借用。問到為何不實景拍攝？祖藍笑道：「邊有一間超市可畀我哋玩轉？」
祖藍又透露劇中與女友李亞男對手戲不多，問到是否刻意避開？他否認道：「劇本係我寫嘅，亞男主要同張繼聰多對手戲，因為佢對住我會忍唔到笑，點知佢對住阿聰都係忍不到。（二人可有親熱戲？）咁我又不會咁安排，因為佢哋之前拍《忠奸人》已經有咀戲，我要積極說服謝安琪拍劇，咀返佢。」
細細粒自爆「超市高買」
細細粒在戲中造型被祖藍笑指似千頌伊，她卻否認是扮對方，笑言是想扮周慧敏。昨日戴上近萬元長假髮拍攝的她，透露劇中會有多個造型，其中包括宮廷造型。一向饞嘴的細細粒，自爆在「超市高買」，她笑道：「我忍咗十日喇，監製日日追住我，叫我唔好偷食，因為無補貨，今日尾場居然唔安排我來拍，不過我日日都偷飲品同花生，我偷嘢好叻，蚊蚊都有偷到啲梨。」
細細粒今次為了拍劇獻出了熒幕初吻給阿Bob，她說：「之後同阿Bob仲會有床上戲，好擔心唔知着咩衫，之前阿Bob已經攞咗我熒幕和現實嘅初吻，不過錫完我就好想講一句：『下次畀個好啲我吖，唔該！』」她又不明為何一場床戲，祖藍要寫三頁劇本，自言仍是處子之身的細細粒，被問到會否問人取經？她搞笑說：「阿Bob咁叻，任佢魚肉，無理由為咗拍戲而煲鹹片。」
萬綺雯被Bob一咀即喊
造型酷似朝鮮領導人金正恩的阿Bob，對於細細粒表示要向他請教拍床戲，他抵死笑說：「我諗住打真軍......私底下。」細細粒即說：「我要搵替身。」阿Bob就笑窒細細粒說：「全港都搵唔到呢個替身。」他又指有兩場戲是他很期待的，一是與蚊蚊拍咀戲，而另一場就是與細細粒的床戲。問到阿Bob會否借出自己的私人珍藏給細細粒參考？他不諱言有很多「珍藏」：「我屋企是有好多『豉油碟』，如果唔係點生三個？」
有份編劇的祖藍就搞笑說：「我游說咗細細粒好耐，仲三顧草蘆，啲床上戲會點到即止，而細細粒就同鍾嘉欣一樣，係健康的性感。」
萬綺雯表示在戲中的角色是很易會暈倒，兼且無自信。蚊蚊表示劇中阿Bob飾演其男友，所以二人會有咀戲，不過後來被細細粒撬牆腳，她大笑說：「佢話我條腰不知所謂，呢句係阿Bob自己加的對白。」而她與郭晉安今次都會有咀戲，問到老公有何意見？蚊蚊說：「老公都預咗有(咀戲)，第一集拍結婚場面時同安仔都有錫吓，始終係喜劇，我又唔係偷情，老公有問我同阿Bob點咀，我就答阿Bob一咀落來我就流眼淚，佢話好小事啫。」
|
放大圖片
