 放大圖片
■陳國峰親手煮了碗足料靚麵比陳凱琳品嚐。
拉麵店一年回本 陳國峰趁勢再開
應屆港姐冠軍陳凱琳（Grace）因為與陳國峰（Penny ）合作《搵食飯團》而成為好友，呢日Penny特別邀請Grace去自己所開的麵館，親手炮製一碗足料靚麵比女方品嚐。見到好友Penny做生意有咁好成績，原來Grace也有興趣做生意，但要一步步來。
「巨聲幫」陳國峰唱功了得就係人都知，原來他也甚有生意頭腦，年紀輕輕已經成為老闆，和幾位友人夾份在佐敦開設的日本拉麵店開業一年，已經做到收支平衡，本月更於西環開分店。「因為緣分的關係，和《Big Boys Club》的節目監製謝英偉（Kent Gor）十分投契，咁阿Kent話合作搞食肆生意，自己也覺得不妨一試。首次做老闆心情既緊張又興奮，個人投資了6位數，現在剛好一年，也算有不錯的成績，所以我們決定乘勝追擊，於西環高街再開更大面積分店。」陳國峰順勢問陳凱琳有冇興趣一起過下老闆癮？Grace說：「有，但一步步慢慢來，我鍾意食西餐，要搞都搞西餐。投資生意要好謹慎，我不想交學費，搞到損手離場。」
監製盛讚Grace表現自然
正所謂力不到不為財，訪問當日監製Kent Gor正好落舖巡視，見到Grace的到來，立即叫Penny親手煮碗牛舌拉麵予伊人品嚐。言談間，原來Grace今次參與《搵食飯團》，Kent Gor一早開節目時，已經構思想找Grace，Kent說 ：「之前在公司走廊見到Grace，我同佢講話想找她做飲食節目，佢好爽快地一口就答應。但都要公司放人先得，始終她是應屆港姐，公司會顧及她的形象。後來她加入做主持，做得好舒服自然，不會矯飾。」在旁聽到監製如此盛讚自己，Grace笑言首次正式主持節目拍攝輕鬆：「很多謝Kent找我做這個節目，自己是新人，咩都想試，做飲食節目最緊要自然，我不介意大啖大啖食，在節目中我都係做返自己。拍呢個節目前我都有擔心，因為港姐有很多慈善活動要參與，當初怕冇咁多時候join劇組，但Kent Gor同我講，只要我有時間，隨時可以join。所以有時我早上有活動，就下午加入拍攝隊伍。」
Penny最怕吃苦瓜
一向身形纖瘦的陳凱琳表示自己好鍾意食東西，但卻因為自己食極唔肥，所以自己都會唔開心。Grace表示因為自己瘦，人人以為自己為靚而減肥，其實已經食好多，但真係食極唔肥，咁講好似晒命咁。Grace說：「只要食得開心，食得健康，多做運動，就可以食極唔肥，我想將個正面信息傳出去。」作為新人，Grace表示拍到呢個節目最大得着就是多人認識，更加入屋。話說做咗呢個節目後，凱琳與媽媽去九龍城食飯，老闆表示可以免費請母女食一餐。她說：「我不是貪小便宜，不過有人識，對我咁親切，我覺得好開心。我們成日周圍食，食到有人識，有人仲同我講，我去食嘢唔使畀錢。」
Grace同Penny食勻港九新界，問到有冇試過食奇怪食物？Grace說：「有，本來去食韓國菜，但突然要我們飲蠶蛹湯。大隻仔(溫家偉)在外國大，動物的手手腳腳、內臟，佢唔肯食，得我同Penny肯食。」Penny表示自己最怕吃苦瓜，幸好在節目中未試過。
採訪：植毅儀
攝影：莫雪芝
場地：巨一麵堂
服裝：Caramel(陳凱琳)、Lee Jeans(陳國鋒)
眼鏡：Fleye Glasses(陳凱琳)
髮型：Hair Salon Charles Ng(陳凱琳)
|
放大圖片
