|
真係薑愈老愈辣，巫斯義年紀都有番咁上下，起碼五十歲過外，佢仲可以喺墨盃上陣經已難得，最妙就係夥拍隻「紅色禮物」，呢隻夏佳理名下愛駒，跑到今時今日，又係年紀一把經已九歲，兩個老傢伙，一齊跑墨盃，滿以為陪跑分子，點知依然可以跑番一席第二名，替馬主贏得七百二十萬港元，仲多過喺香港贏一級賽，難怪夏佳理咁信巫斯義，「紅色禮物」真係佢騎得最好。講番呢次巫斯義，佢上個禮拜騎「尊兄」要被罰停賽，不過延遲到月中至停，但喺呢段期間，以老巫目前狀態咁弗，定會努力搵啲度假費。好似呢次葉楚航搵佢騎隻「實業風采」咁，本來唔輪到巫斯義騎，但因為騎開呢隻馬嘅鄭雨滇要停賽十八日關係，肥水點都要益下家，於是倉主搵巫斯義披甲，出戰呢場千八米。事實上，呢隻馬上季開齋路程係田草千六米，去到季尾，經已贏千八米，今季繼續成長之後，跑千六米經已嫌短。季內由鄭雨滇所跑兩仗，最初一仗跑田草千四米得第四名，其實表現唔錯，但再出跑番曾經有過贏馬紀錄嘅田草千六米，反而表現冇千四米咁好，只得第五名。其實，呢次跑千六米表現唔及千四米咁好是可以理解，季初第一仗，隻馬仲有多少新鮮感，但新鮮感過後，跑千六米經已嫌短，故呢次跑田草千八米先至係呢隻馬最佳路程，用巫斯義跑，呢位仁兄最強係乜，當然長途戰，呢次「實業風采」可以講話人強馬壯，應該可以幫葉楚航贏番場。
其實葉楚航今季常搵巫斯義騎一啲邊線馬出擊，早排就有「香港興旺」及「欖球大使」，卻未竟全功，講真呢類馬唔易贏，用巫斯義就係想憑騎功搭夠，所謂哽得多豬頭骨，有時都要益番下人食番塊肥豬肉，今次葉楚航呢隻「實業風采」係咪肥豬肉就唔知，但肯定唔係豬頭骨。
|
