|
有時貼士唔需要問，只要知道局中人點樣睇法，咁就知道戰駒機會如何。先兩日有兩位西裝友走入徐廄，據悉係「馬瀚匹域」幕後主理人，期間因為徐雨石唔喺度，兩人見到副練何敬森在場，該兩人自我介紹一番後，便詢問愛駒「馬瀚匹域」機會及狀態進展如何，副練口直心快，話隻馬上季至今八戰均未見過有走勢，如何談得上機會，論水準只係初起。副練心底說話講完，以為探訪者會罷休，但事實唔係想像中咁簡單，兩位西裝友直指「馬瀚匹域」屬大長途種，今次出戰二千二應屬最佳出路，加上今次所用騎師杜滿萊亦屬幕後預早搵定。呢個時候副練目瞪口呆，乜杜滿萊唔係倉主搵番嚟？心想呢次講多錯多，唯有改口機會唔差得過同場廄侶「故事」。其實明眼人從旁聽到都知道「馬瀚匹域」應該唔夠「故事」咁正斗，但副練又礙於唔敢得失呢兩位入馬房探班人士，於是急急以操馬為由，打個招呼便脫身而去。大家知道副練點睇頭場一對徐廄馬機會後，邊匹屬主力相信心中經已有數，當然「馬瀚匹域」幕後亦好有決心，如果唔係點會憑自己關係搵來杜滿萊出戰，所以邊線博吓冷腳，「馬瀚匹域」亦可考慮，馬膽則不妨揀「故事」。
講真，徐雨石季初馬房開季拜神切燒豬時候，曾經對各馬主表明心跡，佢希望秉承師父新界簡大志，仿效師兄弟葉楚航一樣，可以坐上冠軍練馬師寶座，當然要當呢個冠軍仲需一番努力，不過佢應承過自己，每季成績要力爭上游，博馬原則三個字咁簡單「場場鍊」，唔會理馬匹冷門或熱門，亦唔會特別為個別口味馬主服務，例如喜冷惡熱口味者，一經開口需特別要求，倉主寧願唔要馬，呢個就係大舊石對馬主的底線。
太陽戰士倉主督操
講番之前兩位西裝友入馬房睇「馬瀚匹域」期間，倉主嗰陣時去咗邊？原來佢親自到機坪監督「太陽戰士」嘅操練，大家如果唔善忘嘅話，季初倉主經常親自戎裝操踱呢隻馬，結果今季兩戰取得一冠一亞，如今雖然冇鄭雨滇披甲，但馬房用上柏寶，配搭之強可以話比贏馬嗰仗有過之而無不及，睇練馬師咁緊張，去到尾場依然都要搵徐廄馬當贏錢扶手棍。
金紫荊晨課火噴噴
徐廄季初特別善用老馬，上季「金紫荊」喺九至十一月份一口氣數咗三Ｗ，今季部署亦一樣，但季初狀態的確冇上季咁正斗，首戰列陣，馬房方面論馬兒機會係指定QT腳，馬主亦好穩陣，實行細Q大注三重彩，點知跑馬永遠冇穩陣，要佢跑第三就夠，但最終得個梗頸四，最後當然輸錢收場，今次再出機會又點睇？小道消息指「金紫荊」日前有個動作值得可喜，就係隻馬喺行街時候，突然發老脾咬佢前面隻廄侶「四喜滿堂」屁股，好彩「四喜滿堂」屁股夠大夠圓渾，加上「金紫荊」呢一咬並未咬得應棍，只係留咗幾隻牙印，但另一方面，「四喜滿堂」亦唔忿氣，頻起雙飛打後蹄保護自己，在場兩位馬伕醒目，立刻分開兩駒避免意外發生，由「金紫荊」呢個咬其他馬匹動作所見，隻馬火氣咁好，經已有番爭勝水準。
|
