 放大圖片
（第一場）「麟轉乾坤」最近三戰於谷草取得冠亞季各一，表現日趨穩定，剛戰改留住衝跑法效果唔曳，翌日落王牌再報名，咁心急必有所圖，增程會更合腳法，加上有黃金一檔之助，坐位望贏續可做到。
（第二場）「萬醒駒」對上三戰全入前四名，尤其是近兩場都是排十二檔，難得最終仍悉數走入前列，不愧為路程專家，今次檔位轉好，韋達又肯再騎，值得追多次。
（第三場）「龍華太旨」季內三戰全角逐冇乜根據的場地，敗績毋須介懷，最難得是每仗都輸得唔算遠，證明現時狀態夠弗，今次終於跑番曾五捷的谷草，形勢由弱變番強，跑出水準，是有條件重振聲威。
（第四場）「萬眾期待」幕後很熱衷參與此項國際騎師錦標賽，上兩屆均有列陣並皆獲得亞軍，成績理想，剛戰在同一路程擊敗「皇龍寶駒」打開勝利門，六歲馬終能吐氣揚眉，開竅後有機會贏開就贏，排六檔配麥道朗，各項條件俱好，值得繼續追。
（第五場）「悅欣賞」自上季尾贏馬開竅後，季內再增添一冠兩亞佳績，四歲馬質新正當銳，評分高處未算高，勤跑不疲體力佳，狀態弗到震，由蘇銘倫執韁兼排五檔，形勢大好，屬穩亞望冠之實力分子。
（第六場）「活力歡騰」剛戰終達至大滿貫壯舉，成為一匹可贏田草、谷草及泥地三項唔同賽道之全材馬，北半球馬僅四歲已咁厲害，前途無可限量，首選地位不變。
（第七場）「珍珠旺」田草千四與谷草一哩步頻相若，所以過往見過唔少轉場成功例子，此駒既然之前搏來搏去都贏唔到，安排渡江一試或會有突破性演出，冷值一博。
（第八場）「神聖火炬」前仗有本事迫到「比卡超」使出真功夫，本身亦非易與之輩，之前谷草僅跑過一次，基數少未必完全唔適合，賠率合理值博。
（第九場）「喜喜寶」呢件綵衣曾出產唔少佳駟，此駒既然作為幕後新貴，應存有一定期望，剛戰首次展現具威脅性演出，質新易進步，有力打開勝利門。
|
放大圖片
