 放大圖片
第四場、第四班、一六五○米。「海洋活力」前仗季內首戰可以話輸未熱身跑長途吃虧，但上場熱咗身跑得仲衰，竟然在田草二千米輸十幾個馬位包尾而回，事後翻看影片，發現騎師蔡明紹將隻馬全程置於大外疊跑，人家跑二千米，佢起碼跑多二百米，就算係馬王都要輸啦，所以呢場賽績可以抹去，話晒本身上季能夠分別擊敗「幸運新寶」同「辣得醒」取得兩Ｗ，齋以呢兩場賽績計，在四班絕對有權打橫行，今次隨時東山再起。
第六場、第二班、一八○○米。「魅力星」來港後合共取得六冠兩亞四季，全部都是出自谷草賽事，冠以窄場怪傑美譽實不為過，而上季於同程擊敗「旅遊名牌」贏馬更屬其代表作，後駒其後兩捷並且目前身處二班，由此可見，「魅力星」只要跑出水準，於二班射程範圍絕對是匹相當有惡氣之危險伏兵，吼冷門可向牠打主意。
第七場、第四班、一六五○米。「超群名駒」大前季一口氣於三班贏咗三場頭馬，先是喺田草千六米擊敗「好勝煌」；繼而轉到此程輕勝「銘記心頭」；跟住再於此程挫敗「易搏贏」，短時間內評分由73分暴升至91分，搞到之後足足兩季幾冇馬贏，要坐馬監回氣博減分，直到上季尾開始連續幾場跑入三至五名，逐漸回復競爭能力，今季評分已跌至歷來低位，相信是靜靜起革命時候。
|
放大圖片
