 放大圖片
■羅仲謙認為演員是個沒安全感的職業。
羅仲謙繼《On Call 36小時》後，最近在劇集《醋娘子》和岑麗香再續前緣。和老拍檔合作，謙仔讚「鬼妹仔」香香勤力，每日也背熟劇本才入廠。劇中謙仔享齊人之福，周旋於胡杏兒和香香之間，問到現實中可怕另一半成日呷醋？謙仔自言如果另一半成日呷醋不是好事，但間中呷醋又是一種情趣，唔知楊怡收唔收到呢！■採訪：植毅儀 攝影：吳文釗 化妝：Leo Tam＠Annie G. Chan ASSIST BY CIRCLE 髮型：Jan Chiu@IL Colpo 服裝：Avenue 1218（LCX、朗豪坊）、Koyo Jeans 場地：cafe YAWN
並非「TVB親生仔」的羅仲謙，由寂寂無聞漸升呢為「男一」，獲得不少演出機會，除了一身肌肉夠「煞食」外，其易相處的性格，亦令他在這行吃得開。像再次和香香合作，謙仔得知對方是「中文有限公司」，但仍給予無限的包容。
「今次是繼《On Call 36小時II》後再同香香合演情侶，香香是鬼妹仔又第一次拍古裝，但佢好勤力，每日也背熟劇本才入廠，搞到我都要加倍努力，免得失禮人前。我性格一向開朗，同事們對着我，不會有壓力。」
拍電影出身的謙仔，08年時轉攻電視圈，發展成績不俗，今年更憑《飛虎II》一劇，於《萬千星輝頒獎禮》首度角逐「最佳男主角」，雖然明知是陪跑，但謙仔專程從無錫飛回港出席頒獎禮，誠意可嘉。
「明知自己沒獎攞，論資歷、輩份，怎樣都未輪到我啦，但我同公司講，始終是自己首次提名，好想參與今次盛事，所以頒獎前一晚凌晨我從無錫飛回港，當去party啦。對住新入行的演員，我會主動和他們傾談，分享一下自己經驗。大家都話電視同電影出現斷層，但其實我呢輩幾困難，每年都有新人加入，電影每年得廿部左右，相對來說，我們的機會比較少。始終大片又未必會用我呢類演員，入到TVB拍劇，都係萬幸的事，因為TVB有一定產量、有劇拍，就當磨練好自己的演技。機會等於一切，演員其實是個沒安全感的職業，手停口停。」
事業再穩定才考慮結婚
在《醋娘子》中，羅仲謙有個醋底老婆胡杏兒。現實中，和楊怡的感情愈來愈穩定，外間相傳2人已有結婚打算。早前謙仔拍新劇《衝線》時，花邊新聞未停過，身為男主角的羅仲謙更和蔡思貝傳緋聞，問到會否怕另一半是大醋埕，謙仔自言適時的呷醋也是一種情趣。
「你睇《醋娘子》都知道，成日呷醋也不是一件好事，搞到家嘈屋閉。但係有些時候呷吓醋，又是一種情趣。我希望另一半適當的時候做適當的事，像有時會扮下傻、有時又會氹吓你，咁就最好啦。同埋現在對異性係會避忌些，以前會覺得行得正企得正冇所謂，就算同女仔close點，只要問心無愧就OK。但現在我寧願做『獨家村』，又或是只同男仔親密些。至於係咪有結婚打算，我希望係工作上再穩定少少先，我本身大男人，想另一半安穩，唔想佢同我一齊飄泊，所以唔會咁草率去做呢個決定。」
訪問中，羅仲謙不止一次強調藝人是一份很沒安全感的職業，今日不知聽日事，所以佢寧願辛苦些，將工作排到密密麻麻，賺得一蚊得一蚊，好等自己將來不用為兩餐而頭痕，問題是，你等得啫，另一半又等不等得呢？況且有仔不是應該趁嫩生咩？
|
放大圖片
