|
無意中上馬會的公眾網頁，睇睇當今二十四位練馬師兵力分布情況，發覺有逾十七個倉口擁有馬匹數目多達五十匹或以上，當中有半數更是處爆倉狀態，多到要於短期內將部份割愛。最少馬就係胡森同孫達志，只得二十幾匹，完全反映甚麼叫做貧富懸殊，不過講係咁講，練馬師胡森在英國有大幅地皮，可作為住宅用途，不單唔窮，且比唔少同業富有，養馬少都冇乜問題，但同樣係老外，旗下馬買少見少，就唔係個個都可以好似呢位老兄咁瀟灑。筆者有個老友Tony Gollan，在澳洲昆士蘭做練馬師，佢靚仔又後生，成績仲相當唔錯，但最近就頻頻被人挖角，好馬走吓一匹又一匹，所講唔係轉倉而係被賣來香港，繼「神舟十號」馬主黃光苗最新買入三歲馬T163「神舟小子」，已到港一併加盟徐雨石，另外兩匹生力軍Ten Speed及Looks Like the Cat，稍後亦都好快運港，其中後駒將由方嘉柏接手，Tony最肉赤就係呢匹愛駒他投，未來唔知名唔緊要，總之一睇佢個樣，好容易就認得佢。 Looks Like the Cat顧名思義似隻貓，咁佢似邊隻貓呢？就係早幾年來港跑國際賽香港短途錦標的「阿帕奇貓」，同樣大白面，好得意，但兩駒血統完全沒有關係，前駒他日有冇「阿帕奇貓」戰功咁卓越？咁就要拭目以待了！
|
