|
本周日大摩又晒馬，似有全面搏殺之意，在新馬錦標派出「飛來猛」列陣，此匹三歲澳洲馬雖仲未出頭，但跨季四戰全入三甲，尤其是上場初跑千四米亦能後上得亞軍，只是輸俾頭馬「藍天飛馬」一個身位，似已為今仗奪取錦標試好晒，體重接近千二磅大馬狀態愈跑愈好，今次盃賽場合大摩自然不會袖手旁觀，加上本身未出頭更是戰意無限，值得跟多鋪。
另一隻極具勝望之摩廄馬是角逐第二班千四米草地的「魔法豪情」，剛戰季內初出面對着「福毅」都毫無懼色，閘前竟然夠膽落飛搏殺，雖然最終以鼻位不敵該駒得亞軍，但已反映幕後自視極高，今次雖然與「福毅」狹路相逢，但兩者負磅差距拉遠，再加上本身省過一場後進度更理想，相信要反先應非難事，值得再追。
出戰第三班二千米草地的「星爾頓」，是摩廄另一匹爭勝實力馬，此匹三歲英國自購馬來港前在英國三戰全勝，當中一役是出戰二級賽兩歲馬超級錦標，戰功卓越。來港後上季只是志在適應水土，冇乜點催谷過，直至今季始納入正軌，經一仗熱身後，翌仗出戰田草千六米立即交出頭馬，以半個身位壓倒「電光火石」；剛戰上二班競逐，卻以一個身位輸俾廄侶「共創美夢」，而影輸俾「夢仙」只能得季軍，呢場好明顯是輸在排十四檔信心唔夠，有讓廄侶先行之嫌。「星爾頓」今場大幅增程至二千米，無疑對三歲馬來說是極高難度挑戰，但看上賽之跑法應該適合發揮，有可觀賠率值得一博。
|
