 放大圖片
潘頓元旦日開始要停賽六日，所以二○一四年最後一戰激發起其鬥志，出盡渾身解數，贏個孖寶兼捧埋新馬錦標先至停賽，算係攞番一個安慰獎，喺呢次一四年最後一戰中，發覺一啲降班馬威力甚強，例如「榮光大道」及「競技英雄」一降班即郁手，前者唔少馬迷都醒目，立刻捉實佢，結果大熱門跑得第二名，不過，另一隻「競技英雄」，則以近七倍賠率勝出，Q位仲搭隻三百倍大冷馬「百利多」。雖然呢條Q派萬幾蚊唔算多，但「百利多」六百幾蚊位置派彩，屬有紀錄以來最冷，所以有時捉下呢類降班馬，或多或少都有機會執到寶。
好似呢次元旦賽咁，唔少場合都有降班實力馬列陣，例如第六場四班跑千六米文廄嗰隻「勝利攻略」（圖3號）咁，雖然季內三戰無功，但千祈咪睇少呢隻七歲馬，只要佢一返四班，又有本錢由蟲變龍。點解咁講，事關文家良養練呢隻馬好有心得，翻查紀錄，以前呢隻馬喺四班跑嘅時候，七仗成績係兩冠兩亞兩殿，基本上呢隻馬跑四班賽事，每仗都一定近，今次又降低一班跑番四班賽事，倉主立刻邀請巫斯義同佢執韁，大家假如有多少印象，文家良今季同巫斯義合作成績唔錯，呢隻「勝利攻略」顯然想搵個好人搏命。
當然有人會諗，雖然「勝利攻略」跑四班賽咁勁，但唔係最近嘅戰績，計起上嚟屬上季初嘅事，目前經已七歲，與當時仲係六歲時候嘅「勝利攻略」相比，多少都有啲分別。論道理似乎有多少根據，但大家再細心睇睇，呢隻馬降班前最後一仗，跑田草千八米，鞍上人賴維銘唔用以往呢隻馬最佳留前鬥後跑法，全程同「奪金」鬥燒，最終當然落敗，但所負只係六個馬位左右，呢仗用咁嘅戰術，只係想多減兩分，目的係鋪好今仗降班路，之後自然是出擊時候。
|
放大圖片
