 放大圖片
上年元旦，騎師之中大家估下邊個最威，佢就係柏寶，個人連下四城，分別贏「瀟洒勁龍」、「信心出擊」、「百年歡」及「舞林高手」。當然以今時今日柏寶嘅號召力，要再一次歷史重演當然唔易，事關今時今日馬圈，經已唔係一個韋達咁簡單，目前騎師陣容，潘頓固然是後起之秀，仲有郭能及莫雷拉都可以話隻手遮天，加埋巫斯義及李寶利呢種好手，柏寶要重溫舊夢，可以話談何容易。不過咁，柏寶始終喺香港騎過一段日子，有實力嘅馬自然可以發圍，好似上個賽日咁，老蔡搵佢騎「神州魅力」，但同場佢試過隻「常妙星」，雖然評分低多少，卻依然獨具慧眼，寧願推庄蔡約翰好意，揀「常妙星」上陣，結果就此爆冷成功，所以呢位澳洲騎師，爛船尚有三斤釘，今次元旦日賽即使未必可以再一次四喜臨門，卻為求頭威頭勢，呢位仁兄嘅馬，依然值得睇住。正如今次替蘇偉賢馬房披甲嘅「創基寶」，呢隻馬上次降回四班上陣，即刻交番一席位置出嚟，證明狀態回勇之餘，本身返回呢個班次上陣佔到上風。其實，上次「創基寶」初戴眼罩上陣表現唔算理想，原因係隻馬初段放得過急，本身又要負重磅跑，以致拉士冇乜後勁頂到尾，好彩呢隻馬戴過一次眼罩之後，近期所見愈來愈適應，呢次再跑田草千二米，汲收上次落敗頭段過急毛病，屆時留住衝，自然可以發揮最佳威力取勝。呢隻馬跑出最佳水準，一般四班馬未必擋得住，值得追多一鋪。
|
放大圖片
