專攻冷馬：自成一格食大茶飯

放大圖片

第四場、第四班、一八○○米。「自成一格」今季跑咗四場，輸得最遠一場只是三個幾身位，前仗喺谷草1650米僅不敵「飛翔星」及「惜福」跑得季軍；上場舊地重遊出閘笨拙失先機仍獲殿軍，六歲馬接連兩場跑得好，已響起復甦訊號，今場出爭條件賽，畢竟曾在一哩途程有三勝三位戰績支持，但幕後竟然兵行險着選擇出戰千八米，食大茶飯之心昭然若揭。

第五場、第四班、一六五○米。「龍之欣」上季一口氣在此程連下三城，其中有場喺四班以輕鬆姿態擒下「綠豆爽」，盡顯超四班實力，不過之後再冇頭馬進帳，最大原因應該是輸在路程，因為三捷後的連續十一仗中，有十場是跑非贏馬途程，只有大前仗是出戰此程，可惜當時排11檔，沿途處極度不利形勢下，最終只衝得第四名，今場出戰條件賽，對手各有瑕疵，是東山再起好時機。

第八場、第三班、一六五○米。「萬馬奔騰」今季都算冇乜運，跑咗四場全排在10檔以外，但當中竟然有兩場得亞軍，分別是首戰於直路賽輸俾「十二門徒」，而壓倒其後已勝的「聖驛善」及「御鋒」獲亞；翌仗增程1400米則跟「聰敏不凡」串Ｑ，齋計呢兩場賽績，要在三班贏馬根本冇乜難度，今賽前特意渡江試谷草閘，已經仄好晒場地性能而非貿然出擊，有分頭千祈咪輕易放過。