 放大圖片
近呢兩日天氣時晴時雨，雖然雨勢唔大，但落起嚟有時都好密，加上氣溫只得十餘度左右，喺戶外活動有時都幾凍，尤其係操馬，前兩日下午落起綿綿細雨，但機坪裡面一樣見唔少戰馬操練，沈集成呢日下午擔起雨傘企喺欄邊，睇住佢三隻參賽戰馬備課，呢三隻分別係由徐貴良所騎「大勇士」（圖8號）、「華麗登場」副練及「長勝勇將」周漢昌，三隻馬一列長蛇陣排開喺沈集成面前走花蹄，倉主企喺欄邊食住西北風睇呢三隻馬，一直踱咗十幾分鐘，倉主就睇足咁耐，動態非常緊張，呢三隻馬雖然未必隻隻贏，但肯定隻隻搏。
事實上，沈集成今晚唔止出三駒咁少，總數有六隻馬上陣，其餘仲有「創意寶」、「無敵猛將」及「勝利寶石」，但大家睇睇所配騎師，「創意寶」及「勝利寶石」用楊明綸，「無敵猛將」則用蘇狄雄，呢三駒用本地土炮應非牌面馬，反而睇睇倉主督操呢三隻馬，「大勇士」沿用贏開嘅郭能，「長勝勇將」借重雷神，仲有「華麗登場」由紀仁安操刀，上述呢三隻馬配搭咁強，相信唔使畫公仔畫出腸都表明已滿肚密圈。先講喺第三場出戰谷草千二米嗰隻「大勇士」，近兩仗由郭能接手之後表現好似脫胎換骨，第一次接手即贏馬而回，以一條馬頸位力挫「心花怒放」開齋，之後再出加磅及檔位各樣條件都冇贏嗰次咁好，事關贏馬嗰次「大勇士」排三檔，再出呢次則排九檔，咁仲不特止，贏馬後磅位加咗六磅，各種條件都比贏馬嗰次不利，但馬兒喺郭能胯下依然可以跑得一席第二名，只係輸俾「銀飛龍」短頭位，但大家再睇睇「銀飛龍」再出再爆，反映該役千二米水準唔差，因此，今仗「大勇士」保持勇態再來，復排一個較有利二檔，經已有收復前失本錢，相信係沈廄今晚嘅過關纜躉，值得作為馬膽看待。
長勝勇將雷神交代
到咗第四場隻「長勝勇將」，上季降落四班上陣，到季尾階段經已有上名成績交出，踏入今季馬房更銳意安排呢匹馬向泥地發展，希望喺呢個場地試出彩虹，不過，泥地賽程畢竟有限，呢匹馬上次泥地千八米由潘頓出擊遇伏，被臨場落飛「好腳頭」於最後趕過，僅得一席第二名，結果還是未能贏馬。當然，證明「長勝勇將」泥地合性能，但馬匹仲未交代，今次毅然出戰谷草千八米，縱使潘頓停賽，倉主立刻搵佢對頭人雷神執韁，呢位巴西好手，仄過兩課就一口答允上陣，贏唔贏當然要跑過至知，但肯定必定鍊到盡，事關今次唔鍊到盡，下次就會益番潘頓，所以呢隻馬一定勇往直前，大家都唔使諗咁多。
華麗登場還我本來
上述三隻由大師傅所騎嘅沈廄馬之中，今季表現最令人失望都係嗰隻「華麗登場」，季內跑過五場未有一仗上名，不過最近兩仗落番三班上陣，狀態方面亦開始好緊，陣上所輸距離經已愈嚟愈近，近兩次三班戰都輸唔夠三個馬位，經過季內五次熱身之後，今次轉跑利前置嘅谷賽，並由紀仁安執韁，級數唔差得過以往贏開呢隻馬嘅韋達，半冷門大家不妨盯實佢。
|
放大圖片
