 放大圖片
今晚快活谷跑八場草地賽事，以C欄C＋3彎作賽，頭場下午七時十五分開跑，全晚唯一錦標是由二班馬跑千二米角逐紀利華木球會盃。馬房方面，蘇偉賢派出多匹實力馬列陣，當要優先留意動向。騎師方面，今次潘頓停賽復出，應是大開殺戒時候，當然對頭人雷神亦手執不少惡馬，均要注意。
第一場、第五班、一二○○米。「新寵」雖無過人之質，惟在此群作賽爛船仍有三斤釘，季內五戰雖不入三甲，但看前仗出爭谷草千二米，在柏寶胯下排八檔起步，留前鬥後追得第六，只負頭馬「紅運飛駒」兩馬位，而今再戰此程只要交回前仗後上追勢，絕對有能力締造冷門戰果。
第二場、第四班、一二○○米。「萬醒駒」今季評五十七分喺四班跑過八仗，最近一連五仗出爭谷草千二取得兩亞兩季一殿，表現準得交關，尤其上賽配杜利萊排七檔出閘，留守馬群中疊競跑，入直路兜出外疊打衝鋒全力衝刺，誰不知鬥到終點前追唔到「銀飛龍」，馬兒卻出口術噬咬對手過程認真有趣。拚後以慢試儲火為主，今回乘勇再戰必全力衝擊季內首W。
第三場、第四班､一六五○米。「海南花梨」喺四班作賽具一定優勢，今季初評五十四分出爭田草一哩，臨場廿倍冷門配蘇狄雄執韁，狄仔沿途擺前領放，最後終點前才被「津津樂道」追越力保Q腳；上仗再爭同一路程卻與對手互燒，轉入直路兩敗俱傷，拚後小休再作打磨，今仗練者安排渡江轉戰谷草一哩，只要起步順利領放，且戰且走隨時有反底演出。
第四場、第四班、一○○○米。「勝任如意」T布早熟短途快馬，季內初出田草一千米，以九十三倍巨冷跑入Q腳；翌仗操好再報直路賽，起步卻慢閘跟跑一場；上回渡江出戰此程，排二檔應聲彈出，前速更快過大熱門「手到拿來」，結果貼欄一氣呵成放到打開勝門。今回練者食住上入紙再跑開齋路程，憑着當銳之勢兼排黃金一檔，有力再下一城。
第五場、第三班、一二○○米。「御皇鷹」（圖前駒）五歲北半球馬季內實力大爆發，季初喺田草千二打疊兩Ｗ，繼後再跑四仗獲一季兩殿皆與對手鬥得兩咀；上周三渡江出戰千二，閘前落飛打到四十八蚊開跑，結果喺羅理雅胯下後上影贏「華麗登場」取得季內第三W。大摩打鐵趁熱七日後再報新勝途程誓師，且看可否成為季內首匹四捷馬。
第六場、第二班、一二○○米。「龍華太旨」今季評八十五分初出田草一千無功，跑至前仗重返谷草一千米取得頭馬見面；惟上仗轉戰田草直路賽力拚只跑第六，負於頭馬三乘，拚後復課以慢踱備戰，火氣仍堪持續，今次折返窄場千二拿手好戲，發揮出水準隨時再入凱旋門威威。
第七場、第三班､一六五○米。「萬眾期待」六歲仔大器晚成，季內跑過三仗谷草一哩，除首仗抽十檔表現一般外，打後兩戰皆以兵不血刃姿態贏馬，剛仗編在國際騎師賽抽到麥道朗操刀，六檔出閘後吊住第三位，入直路待拉士二百米兜出外疊發力一攻而破，亞軍馬「金刀銀鑽」翌仗再出已補中，足證呢場水準不俗。今次升班孭輕磅角逐首本戲，當紮勇馬隨時締出三連捷佳績。
第八場、第二班、一六五○米。「帝聖神駒」今季轉投賢廄表現猶如逢第二春，初出田草千四殺入冷腳後，翌仗渡江出爭一哩即打響勝門；再出三戰田草千四及谷草一哩更取得冠亞季各一；尤其上賽再戰同程，七檔起步即切入內欄領放，轉入直路柏寶順勢踩油再傳捷報。今趟轉戰二班此程，沿用一貫前領戰略，絕對有力躋身三甲。
|
放大圖片
