 放大圖片
唔講可能大家未必知，上周兩場級際賽，方廄賽前都有馬報名，百週年短途紀念盃嗰場有「天久」，董事盃嗰場有「軍事出擊」，結果雙雙於排位嗰日退出，根據條例，大凡級際賽退出唔需要理由，所以方嘉柏當時冇講原因，直至班小記問佢，點解兩隻都退出，佢就回覆小記，「天久」跑一千米唔算拿手，況且有強敵「幸福指數」在陣，假如硬撼未必過到呢一關，二來可能會拚傷元氣，阻礙日後部署。而「軍事出擊」千六米非現今所長，有隻後起之秀一哩王「步步友」擺擂台，冇把握當然避得就避。「天久」與「軍事出擊」均已報名出戰杜拜，但出戰三月二十八日杜拜大賽前，「天久」會出戰二月十五日主席獎，然後至去跑金莎軒泥地短途。而「軍事出擊」可能跑二月七日百週年紀念瓶，或者唔跑呢一場，等三月一日場金盃，跑完金盃再殺去杜拜，但目前計劃仲未落實，不過，範圍都離唔開其中。
講完方仔未來大計，佢名下「雲呢拿」上周替蕭家軍贏馬，呢個家族今季繼「銀飛龍」兩捷之後，「雲呢拿」係另一隻替呢個家族威威嘅馬，今次夜賽蕭家軍名下又有隻「甜哥兒」出戰第一場五班一六五○米。呢隻馬雖然至今依然三零部隊，但最近兩仗落到五班經已有啲走勢，前仗跑谷草千二距頭馬唔夠三個身位，上場增程一哩，結果成棚馬一齊衝，喺郭能胯下衝得第八，輸唔夠一個身位，仄準實力後，今次跑番同一個路程，顯然已有出擊信心。
|
放大圖片
