文匯精選：王者無敵一出即捧

放大圖片

今年四歲馬系列都咪話競爭得唔激烈，好似啱啱跑完嘅香港經典一哩賽咁，諗住兩隻灰神天下，「和順超影」鬥「大印銀紙」，點知「美麗大師」用番留後衝一段戰略，又再稱霸番，當然仲有兩項四歲馬系列都好矚目，接住第二關係香港經典盃，尾關嗰個就係香港打吡，如果「美麗大師」再繼續掃埋呢兩關，佢好有機會同「威爾頓」爭馬王。但究竟可唔可以咁順利掃到落打吡，咁就真係要睇埋仲有唔少未見底嘅四歲馬近期嘅表現咯，好似呢次第十場二班千四米咁，幾隻初出四歲馬來頭唔嘢少，例如苗禮德旗下「睡德福」和高伯新馬房嘅「王者無敵」，都有機會成為打吡大賽一路雄兵。「睡德福」馬主許章榮好鬼信苗禮德，由南非引入唔少好馬，如啱啱上周三由雷神所披甲跑入第二名隻「酣睡密碼」咁，都係由苗禮德從南非購入。呢隻「睡德福」又係由南非購入，目標當然係想跑打吡，而佢嘅來頭當然唔細，來港前經已喺南非贏三歲千六米好望角堅尼一級賽，所以編入二班跑係有多少着數。

另外一隻來自大手筆馬主潘蘇通嘅「王者無敵」，由高伯新親自從愛爾蘭入貨，來港前最後一仗跑二千一百米沙膠地，本來係第一隻過終點，但最終被告甩，只係得個第二，呢場屬表列賽，換句說話講，呢隻馬亦係相當犀利，「睡德福」及「王者無敵」呢次一齊列陣，假如根據有績可稽嘅情況下，潘先生隻「王者無敵」最值得優先睇。由潘生第一隻所養嘅「手風順」開始，呢隻馬第二仗上陣得第二，第三仗取勝，跟住就係「事事為王」第一仗得季軍，第三及第四仗就打疊贏，仲有「大運財」第二至第三場上陣全部贏晒，到最近「大印銀紙」就係一出即勝，所以「王者無敵」唔買定先，分分鐘贏完後下仗就冇得分。