 放大圖片
今次夜賽姚本輝馬房一共派七隻馬上陣，大家有冇發覺好似大部份坐騎都俾李寶利壟斷，其中四隻實力馬全由李寶利執韁，好似第四場「大哥哥」、第五場「氣勢如虹」、第七場「遊俠兒」及第八場「好精神」。自從「信是有緣」由呢位騎師重啟勝門之後，佢的確多咗沾手姚廄嘅馬，不過咪以為姚本輝一交就彈啲好嘢俾李寶利，遠嘅先唔講住，就上個禮拜六旗下嗰隻「踏雪無痕」，一個大波勾都唔知飛咗去邊，搞到李寶利要拉停，呢類馬交俾佢主要係先俾佢教馬，然後等走勢成熟進步時候，先至再由佢親自收成。其實姚本輝用人非常謹慎，仲要考驗一下呢位仁兄有冇耐性，大家先睇睇今次李寶利四匹姚廄馬，當中有幾隻係首次由佢掛帥，除「氣勢如虹」第一次用佢上陣之外，其餘三隻對上一場或兩場經已由佢騎開，當時呢啲馬狀態根本未在水準，姚本輝就係咁樣考佢耐性，由一隻冇狀態嘅馬跑起，直至有水準爭勝為止，結果咁啱呢幾隻馬可以喺今晚賽事一齊出戰，所以驟眼睇過去，以為姚本輝偏心將啲實力馬益晒李寶利，其實，呢個係李寶利種下嘅善果，如今到咗收成期。
好似第四場隻「大哥哥」，前仗交俾李寶利時候仲身處三班上陣，跑過兩場現時經已落番四班，上次谷草千二米雖然只得第八名，但輸俾頭馬「無敵城堡」唔夠兩個身位，證明狀態經已復甦，再睇「大哥哥」跑田草三班千二米都可以上名，現時喺四班可以話係匹隨時郁得手嘅馬。
遊俠兒值得再追捧
至於出戰第七場三班谷草千二米嗰隻「遊俠兒」，早前由杜滿萊披甲嗰兩仗，基本上狀態經已返嚟，但好可能真係人馬唔夾，兩仗都冇走勢，最近一仗才由李寶利接手，上場人馬第一次合作表現雖然唔係突出，輸三個餘馬位跑第九，但大家睇睇呢場頭馬屬「御皇鷹」，第二名係「酣睡密碼」，前者季內四W，最近亦得亞軍，證明嗰仗水準幾高，「遊俠兒」由李寶利跑過一次有過溝通後，今次準備更足，睇睇最強對手「酣睡密碼」排咗個十一檔，本身排九檔起步，點都有多少偷雞機會，所以值得再追。
好精神馬主入倉探
第八場二班千二米嗰隻「好精神」，上次經已跑入亞軍，狀態已回復爭勝水準，而呢隻馬狀態一有水準係可以維持一段時期，所以今場再來唔使驚會走樣，睇實際賽績，上季曾經試過一口氣取得五場上名成績，應該可以作為尾場穩陣之選。喺上周日下午已見李寶利入姚廄睇馬，期間佢仲陪埋「好精神」馬主入倉，倉主搵咗個騎馬人踱隻「好精神」俾馬主睇，李寶利則向馬主講解進度，狀態來得非常理想。另外「遊俠兒」及「大哥哥」則只係由馬房助理拖出馬格俾李寶利睇兩眼，並無搵人騎踱。而騎練都滿意呢三隻馬近況，不過佢哋就希望呢三隻馬可抽到一至五檔，結果排位之後「大哥哥」及「好精神」俱如願以償，齊齊抽到二檔出擊，只係稍稍對「遊俠兒」九檔唔係咁滿意，不過呢隻馬狀態屬今季最弗一次，所以睇吓有冇運中個三元返嚟。
|
放大圖片
