 放大圖片
蔡約翰呢個農曆年，陪同太太返咗北京度歲，初三前一日趕返嚟督戰，結果憑隻久沉馬「驌龍」捧走賀年盃，計埋嗰次馬年送歲賽五W，可以話由馬年威到羊年，蔡太同蔡神仙去完北京，知道班馬房手足一直緊守崗位，所以買咗唔少手信以作慰勞，當中大部分都係食品，例如一啲特產嘢冰糖葫蘆，兩公婆唔怕麻煩，帶咗一大堆入馬房，見人就派好不熱鬧。而派利是呢一家嘢，當然由蔡太負責，人人一封紅衫魚利是，志在俾各手足取得意頭。雖然上次年初七人日夜賽蔡神仙冇馬贏，跑得最近嗰隻「魚躍鳥飛」，最後都俾隻大冷馬「香港興旺」揀贏咗，不過，呢個倉對啲名氣馬，始終都有番咁上下水準交出。「魚躍鳥飛」相信好快又有機會建功。
講到名氣馬，呢個禮拜日蔡約翰隻名氣馬「詠彩繽紛」（圖9號），仲爭緊分跑打吡，能唔能夠成功，真係要睇埋呢次跑成點，上次初跑千八米唔搶留住嚟衝，結果只跑第七名，輸三個馬位，但大家睇睇呢場頭馬又係蔡約翰嘅馬「酷男」，咁睇「詠彩繽紛」呢場不放而留，係咪有特別任務在身？大家可以估吓，不過點都好，蔡約翰呢隻「酷男」經已達成願望，順利取得打吡入場券，至於另一隻目標馬「詠彩繽紛」，目前只得八十六分，起碼要贏多一場先至有機會出戰打吡，要手頭揸住九十分過外先至穩得正選資格，因此今場千八米對「詠彩繽紛」嚟講，只許成功不可失敗，因為跑第二或三名成績，就算被加分數，最多只係去到九十分左右，能夠獲得正選資格跑打吡，機會只係一半一半。當然，以「詠彩繽紛」目前進度，初跑田草千八米，唔放留住衝都只係輸俾頭馬「酷男」三個身位經已好犀利，呢次放順嚟跑，可望有唔同效果，屆時應可重振雄風。
|
放大圖片
