 放大圖片
連續贏咗十二個賽馬日嘅莫雷拉，終於喺年初七人日斷纜，馬迷追到第九場，依然希望隻初跑谷草一哩嘅「永同天下」能替莫雷拉保住條長贏纜，可惜大熱門跑尾二，無不令雷神擁躉失望而回，不過咁，睇睇呢次周日賽事，雷神手馬殺氣騰騰，單一隻馬王「威爾頓」，經已有坐二望一本錢。除策大摩馬之外，其他馬房嘅馬，好似告達理馬房隻「包勝」，又係雷神另一隻爭勝機會極高嘅籌碼。
先講一講莫雷拉及告達理呢個騎練組合先，因為告達理搵親呢位仁兄都係無事不登三寶殿，就以今季兩位騎練合作成績來計，總共合作過八次，得兩冠兩亞，最近三次仲犀利，冇W有P，「香江福星」跑第一名、「陽明囍囍」及「滿貫豐采」就算贏唔到，都得第二名，所以今次雷神替告達理騎隻「包勝」，大家又可揸定銀紙捧場。
今次「包勝」最特別嘅地方，就係佢唔跑千二米，而係特登跑千四米，大家都知道呢隻馬跑千二米有一冠一亞賽績支持，上場唔係坐包廂追唔切隻「劍飛聲」，相信早已再捷，大家只要睇一睇，呢隻馬可以同「劍飛聲」呢類二班馬一鬥，基本上喺三班係超級之輩，呢次特登加程跑千四米，只係馬房因應馬匹性能所部署，事實上，呢隻馬第一次贏千二米，都係排十四檔蝕位贏馬，上次排一檔反而不妙，要搵位追趕，結果路短之下追唔切，今次增程二百米可以話百利而無一害，值得追多次。
|
