 放大圖片
上個禮拜梁家俊替何良隻「一哥」取勝，目前已達到十六場頭馬，與何澤堯看齊，兩位仁兄可以稱得上華將一哥。梁家俊自上月初，即二月四日憑「如虎添翼」及「行政指令」（圖10號）起個孖寶之後，經已連續六個賽馬日有頭馬進帳，而喺呢六個賽馬日裡面，梁家俊總共勝出八場頭馬，演出神勇不在講，其實好多馬都喺坒膉U跑出彩虹，例如「北非諜影」、「尚華盛甲」、「愛頑皮」、「一哥」及「行政指令」，呢一類馬絕對唔易贏，其中「尚華盛甲」、「愛頑皮」及「行政指令」都係第一次贏馬，好似啱啱贏嘅「一哥」咁，有頂口毛病，未交由梁家俊操刀嘅時候，搵過潘頓、田泰安及郭能重新教口，但都未能成功，後期亦用過黎海榮，一樣搞唔掂，梁家俊季初摸過一仗，卻冇機會沾手騎第二次，但呢兩次何良信任佢，結果連跑兩場之下就立刻重啟勝門，能夠贏到呢隻馬，當然梁家俊有好大功勞，事關呢次遇快步速，「一哥」唔使留得太辛若，鞍上人順勢跟得好位，結果入到直路便安居平五路取勝。其實，梁家俊整個二月份，所贏嘅馬中有唔少屬代表作，「北非諜影」贏一千米直路賽唔出奇，事關贏呢個路程前一仗，亦係跑一千米直路賽，取得第三名，但妙就妙在再出則排一檔跑一千米直路賽，要贏就真係考功夫，結果梁家俊就係做到呢一點，排一檔替「北非諜影」贏一千米直路賽。
講番今次有賽程嘅賀廄馬「行政指令」，上場谷草千八米由梁家俊打開勝門，隻馬之前曾由唔少大師傅騎過，冇一個過江龍舞得掂，偏偏上場第一次交俾梁家俊就建功，所以本地薑唔會差過呢批過江龍，今次「行政指令」原庄配搭出戰，雖然唔係跑贏馬路程谷草千八米，而係縮番落一哩爭功，信任梁家俊騎技，依然捧得過。
|
