獨有消息：連利之星延續旺勢

放大圖片

雷神真係神級騎師，前次日馬連數六W後，可能滯滯哋，又或者鬆下章俾潘頓，夜賽俾潘頓執番四W，但呢次日賽，唔再留情，又一口氣掃五W兼捧走港澳盃，由於呢五場頭馬經已令到佢嘅獎金達到一億一千萬，呢個係一個紀錄，舊紀錄屬○二至○三年由韋達所創嘅一億九百萬，雷神用咗半季多啲啲嘅時間就破到，餘下三十多次賽事，拉遠紀錄仲有大把時間，所以唔封佢為神級騎師都唔得。講真有啲馬，真係冇雷神唔掂，好簡單贏港澳盃呢隻「魔法豪情」，雖然俾人睇到好有信心，臨場賣到十七蚊大熱門獨贏，但如果唔係雷神用盡一檔之利，沿途慳位之餘，又冇俾人困在內欄，只要其中一個地方做得唔好，呢場頭馬定屬「比卡超」。所以好多馬一定要用雷神先至贏到，而「魔法豪情」開竅之後，亦可寄望就此扶搖直上，唔使成日驚出唔到頭。

正如今次夜賽，雷神所騎嗰隻蘇保羅三班馬「連利之星」咁，未搵啱出路嘅時候，經常走入位置，由雷神接手後，近期連跑三次谷草一哩，結果取得兩冠一亞，首次贏馬嗰場，屬四班條件賽，但贏完呢場條件賽，剛戰升上三班，結果一樣喺呢個路程贏埋，又係贏得好容易，呢隻馬真正實力喺雷神胯下徹底咁表露晒出來。今次馬房再同佢出戰谷草一哩，以蘇保羅近期旺勢，上個禮拜連中三元後，現時成績經已打入前四名，過埋告東尼頭，呢個優勢，睇怕可以憑「連利之星」繼續維持落去。