 放大圖片
喺啱啱夜賽嗰晚，馬會發出一個公布，就係話意大利騎師李寶利提前解約，本來佢目標想跑埋打吡，但因搵唔到坐騎，咁啱呢個禮拜日，法國聖格盧馬場有場表列賽莫理斯加利錦標，李寶利被邀請策騎匹實力馬上陣，所以拿拿臨走人。其實，未來外父巫斯義都同佢諗過計，四周搵實力坐騎上陣，雖然打吡搵唔到坐騎，總希望一家人，同埋女兒可以跑埋周日返法國，又或者幫外父打下氣，事關佢隻「期惑」未必冇機會，不過，最後李寶利都揀咗早走，多一日都唔留戀。咁又好難怪，李寶利喺呢段客串期間，佢經已贏咗十六場頭馬，係一個非常稱職嘅過江龍。不過，就點都冇香港練馬師欣賞佢，睇睇呢次打吡大賽，十四匹參戰馬之中，竟然有五匹馬邀請外援披甲，呢幾位外援，包括有莫雅、蘇銘倫、安國倫、布文及范德保，起初李寶利諗住有機會執番一隻半隻坐騎上陣，如今確認冇機會，事關呢一批人馬，大部分都係有名騎師，即使名氣較次范德保，當年嚟香港客串都係成績麻麻哋，但現今喺南非走紅，而苗禮德亦都唔係一個容易服侍嘅練馬師，能夠吸引到佢請過嚟跑打吡，當然有佢嘅道理。
呢批一日牌照過江龍，葉楚航非常醒目，知悉容天鵬隻「醒目名駒」搵安國倫上陣，於是立刻邀請安國倫同佢騎兩隻馬，呢兩隻分別係「旅遊一哥」同埋「育成群駒」。安國倫點解咁受葉楚航重視，原來葉楚航當冠軍練馬師嗰季，有唔少難贏馬一交俾安國倫上陣都有唔錯成績交出，「旅遊一哥」初次上陣，可能未搵到適合人選，所以益埋安國倫，但另外嗰隻「育成群駒」，今季跑來跑去，即使用埋潘頓上陣亦都冇符，點都贏唔到，今次出戰千四米，試下搵安國倫幫手，論馬經已操勇，就係只欠一位識得發揮呢隻馬嘅好手。
|
放大圖片
