 放大圖片
蔡約翰馬房喺今晚泥地戰竟然派七駒列陣，據消息所得，除用雷神幾駒具爭勝分量之外，配楊明綸及蘇狄雄嘅賽駒亦非善男信女，喜歡吼半冷門馬迷，不妨落足心機吼吓呢兩位小將胯下嘅蔡揮勻M。周一排位朝，倉主一早搵人約定楊明綸及蘇狄雄入倉睇馬，馬房準備咗「勁開心」及「首飾多寶」喺馬房地堂，等呢兩位本地薑到來觀察，期間倉主與副練都好細心咁講解呢兩隻馬嘅近期狀態進展及特性如何，等呢兩位本地薑有個概念。
先講楊明綸所騎嗰隻「勁開心」，上次跑谷草千二米跑第九，呢個第九名其實只係輸俾頭馬「至尊飛星」三個餘馬位，當然其草地威力唔及泥戰咁勁，今次轉番跑泥地短途，又係呢隻馬發揮水準嘅時候。大家睇一睇呢隻馬季內所跑過嘅八場泥地賽，成績屬兩冠三亞一季一殿，僅兩次三甲不入，所贏兩場泥地賽有千二米及一哩，今次跑番泥地千二米雖然無雷神幫手，同場雷神揀咗「京城珍寶」出戰，不過，蔡約翰肯部署呢隻馬撼雷神惡馬，當然有其知己知彼，百戰百勝道理，呢場形勢，當然係雷神坐騎「京城珍寶」孭晒飛，但呢匹馬今次初上三班，相對「勁開心」贏過呢個班，更換來好分頭，唔搏命出冷等幾時？
首飾多寶伺機突襲
另外由蘇狄雄騎嘅蔡敦芋u首飾多寶」，被安排於第八場出戰泥地千八米，呢隻馬上場於谷草一哩跑得亞軍，輸俾「連利之星」兩個餘馬位，到目前為止呢匹馬贏馬路程有谷草一哩及千八米同田草千六米，講性能唔算窄，若馬房要替呢隻馬出戰較合腳法路程，喺上周六田草三班有千六米可供呢隻馬上陣，即係「金剛仔」所贏一仗，但馬房偏偏唔安排跑呢一仗，特登留力跑今場泥地千八米。查一查「首飾多寶」以往只跑過兩次泥地，一次一哩一次千八米，兩次都無三甲成績，但其中一次泥地一哩戰，當時仲跑緊二班賽，結果跑入第十名，只輸三個餘身位，呢場頭三甲馬，大家又知唔知係乜馬？順序冠亞季分別係「旗幟鮮明」、「好先生」及「將男」，呢批根本唔係二班馬，而係一班分子，「首飾多寶」泥戰有呢個成績支持，目前喺三班威力真係唔可以睇小。當楊明綸同蘇狄雄睇完呢兩隻馬後，前者突然醒起仲有隻「川河猛駒」上陣，倉主亦差啲唔記得，於是拿拿臨吩咐副練將呢隻馬拖出馬格俾楊明綸過目，但睇倉主無乜在意呢隻馬嘅動態，屆時呢個倉嘅出擊箭頭，都應該會喺「勁開心」及「首飾多寶」兩駒身上。
紅衣前進轉場開胡
至於雷神三隻蔡廄實力馬之中，「嫡愛」當然有坐二望一機會，但另外質新馬「紅衣前進」，上場初出田草千二米即得第三，今次馬房安排角逐泥地千二米，機會又如何？據消息指出，上場馬匹入位狀態僅得七成，開完氣後現在有九成水準，賽前馬房刻意由雷神替呢匹馬試多課泥閘，輕鬆得第二名，經已試準晒泥地性能。其實，四班田草千二米今周日都有得跑，馬房唔替「紅衣前進」報跑呢場而提早出戰泥地，信心經已話晒俾大家聽，仲係爆棚嗰隻。
|
放大圖片
