 放大圖片
港隊七駒遠征杜拜，馬王「威爾頓」喺司馬經典賽得梗頸四，另外草及泥地兩項短途錦標，第一個阿喬斯短途錦標，一直被人睇好嘅告東尼戰駒「幸福指數」，最終只得第二名，唔夠愛爾蘭八歲老鬼「獨掌全權」鬥。而金莎軒泥地賽，今次美丹全天候跑道改鋪泥地，雖然益番美國馬「神秘集團」奪標，但賽前唔係咁受人睇好嗰隻「積多福」，可以喺莫雅胯下追到對手氣咳，印證「積多福」原來先至係真正泥地王，馬主之一東尼劉講，下一年有機會重來，一定會跑得更好。
雖然今年杜拜之行，港隊冇頭馬收穫，但七隻代表馬，除「天久」冇獎金外，其餘六隻馬均有獎金落袋，最少獎金跑第五名嘅「崇山寶」亦有四萬美金，可以作為馬房小費打賞，馬主賺咗個玩，而港馬兩亞一季兩殿一第五成績，總共取得過百萬美元獎金，攞到油王多少養馬贊助費。
相隔一日，日本跑高松宮紀念賽，港隊只派「友瑩格」單刀赴會，即使比賽期間，「友瑩格」最唔想見到嘅天雨狀況，當日主隊竟有雨神幫手，落起連綿細雨，好彩「友瑩格」不愧港馬短途新貴，閘前第一匹彈出，潘頓留放有度，中段稍留，最後仲有兩啖氣，谷埋跑最後一百米該段小斜路，結果力拒一眾日本好手取得冠軍，呢次港隊馬可以講得上係失之東隅、收之桑榆。
話時話，韋達騎輸隻「幸福指數」，賽後你點睇？好多人認為唔應該輸，尤其輸俾隻老鬼「獨掌全權」，但韋達同人講，佢一啲都冇跑錯，其實，客觀睇「友瑩格」劣勢下潘頓可以騎番起隻馬取勝，咁呢啲算唔算後浪推前浪，難怪潘頓呢股後浪臨去日本之前，高伯新經已搵定佢返嚟騎隻「福嘉皇」出戰谷草千二米，上次杜利萊點輸法，後上不及輸個馬頸，呢次轉人騎，效果相信會唔同。
|
放大圖片
